എംഎസ് ധോണിയ്ക്ക് ശേഷം ടീം ഇന്ത്യക്ക് സൂപ്പർ ഫിനിഷറെ കിട്ടിയോ എന്ന് ചോദിച്ചാൽ ആരാധകർ ഒരുപക്ഷേ റിങ്കു സിംഗിന്റെ പേര് പറയും. കോടികൾ മുടക്കി ഓരോ ഫ്രാഞ്ചൈസികളും താരങ്ങളെ സ്വന്തമാക്കുമ്പോൾ റിങ്കു സിംഗിന്റെ പ്രതിഫലം 55 ലക്ഷം രൂപയാണ്. ചെറിയ പ്രതിഫലമല്ലേ മറ്റ് യുവതാരങ്ങളെ അപേക്ഷിച്ച് റിങ്കുവിന് ലഭിക്കുന്നതെന്ന് ചൂണ്ടിക്കാട്ടിയപ്പോൾ ആ തുകപോലും തനിക്ക് വലുതാണെന്നാണ് താരം പറഞ്ഞത്. ദൈനിക് ജാഗരണിന് നൽകിയ അഭിമുഖത്തിലാണ് റിങ്കു പ്രതിഫലത്തെക്കുറിച്ച് പറഞ്ഞത്.
താൻ സ്വപ്നം കണ്ടതിനേക്കാൾ കൂടുതൽ പ്രതിഫലമാണ് ഇപ്പോൾ ലഭിക്കുന്നത്. കുട്ടിയായിരുന്നപ്പോൾ 5 രൂപയും 10 രൂപയും ഉണ്ടാക്കുന്നതിനെ പറ്റിയാണ് ഞാൻ ചിന്തിച്ചിരുന്നത്. ഇപ്പോൾ 55 ലക്ഷം രൂപയാണ് പ്രതിഫലമായി ലഭിക്കുന്നത്. ദൈവം തരുന്നതിൽ ഞാൻ സന്തുഷ്ടനാണ്. അത് എത്ര തുകയായാലും അതിൽ സന്തോഷിക്കാനാണ് എനിക്ക് ഇഷ്ടമെന്നും റിങ്കു പറഞ്ഞു. വളരെ കഠിനമായ ജീവിത സാഹചര്യങ്ങളിലൂടെ കടന്നുവന്നവനാണ് ഞാൻ. അതുകൊണ്ട് ഓരോ രൂപയുടെയും മൂല്യത്തെ കുറിച്ച് എനിക്കറിയാമെന്നും റിങ്കു കൂട്ടിച്ചേർത്തു.
ഐപിഎല്ലിൽ താരം മോശം ഫോമിലായിരുന്നു. ആരാധകർ ഇതിനെതിരെ വിമർശനം ഉന്നയിച്ചിരുന്നു. മോശം സമയമാകുമ്പോൾ ബാറ്റിംഗും മോശമാകുമെന്നാണ് റിങ്കു പറഞ്ഞത്. ടി20 ലോകകപ്പിനുള്ള ടീമിൽ റിസർവ്വ് താരമായി റിങ്കു ഉൾപ്പെട്ടിട്ടുണ്ട്. ലോകകപ്പ് കളിക്കാൻ പോകുകയാണെന്നും കിരീടം സ്വന്തമാക്കുകയാണ് ലക്ഷ്യമെന്നും ഒരു വലിയ വിജയം രാജ്യത്തിനായി നേടണമെന്നാണ് തന്റെ ആഗ്രഹമെന്നും റിങ്കു സിംഗ് പറഞ്ഞു.
