വോക്കൽ കോഡിന് വീക്കം സംഭവിച്ചതിനാൽ, സംസാരിക്കാൻ കഴിയാതെ പൂർണ വിശ്രമത്തിലാണ് നടി ജോളി ചിറയത്ത്. ആരുമായും ഫോണിൽ ബന്ധപ്പെടാനും സംസാരിക്കാനും കഴിയാത്ത സാഹചര്യത്തിലാണെന്നും നടി ദു:ഖത്തോടെ അറിയിച്ചു. 23 വര്ഷത്തിന് മുമ്പ് സമാനമായ രോഗാവസ്ഥയിലൂടെ താന് കടന്നുപോയിരുന്നതായും നടി ഫെയ്സ്ബുക്കില് പങ്കുവച്ച കുറിപ്പിൽ പറയുന്നു.
’23 വർഷം മുമ്പ് വന്ന് ‘ആ’ എന്ന് ഉച്ചരിക്കാൻ ആവാത്ത വിധം ശബ്ദം അടഞ്ഞ് പോവുകയും കുറച്ച് കാലത്തെ ട്രീറ്റ്മെൻ്റിന് ശേഷം മാറിയ വോക്കൽകോഡ് ഇഷ്യൂസ് ഈയടുത്ത് കുറച്ച് കാലമായി ബുദ്ധിമുട്ടിക്കുന്നു. വോക്കൽ കോഡിൽ നോഡ്യൂൾ സ്ഫോം ചെയ്യുന്നു. ശ്രമപ്പെട്ട് സംസാരിച്ച് സംസാരിച്ച് അവിടെ മുറിവ് ഉണ്ടാകുന്നതാണ് വേദനക്കും സംസാരശേഷി നഷ്ടപ്പെടുന്നതിനും കാരണം.
മരുന്നിനേക്കാൾ ശബ്ദത്തിന് വിശ്രമം എന്നതാണ് ഒരേയൊരു റെമഡി. ആരെങ്കിലും വിളിച്ചാൽ കോൾ അറ്റന്റ് ചെയ്യാൻ പറ്റാത്തതിനാൽ ഫോൺ ഓഫ് മോഡിൽ ആണ്.വീട്ടിൽ വൈഫൈ കണക്റ്റഡ് ആയതിനാൽ സുഹൃത്തുക്കൾക്ക് എന്തെങ്കിലും ആവശ്യങ്ങൾക്ക് മെസ്സൻജർ / വാട്ട്സ്പ്പ് വഴി ബന്ധപ്പെടാം.’- ജോളി ചിറയത്ത് കുറിച്ചു.
അങ്കമാലി ഡയറീസ്, കടുവ, സുലൈഖ മന്സില്, തൊട്ടപ്പന് തുടങ്ങി നിരവധി ചിത്രങ്ങളിലെ കഥാപാത്രങ്ങളിലൂടെ ശ്രദ്ധേയയായ നടിയാണ് ജോളി ചിറയത്ത്.
