മലയാളത്തിൽ അഭിനയിക്കാൻ ആഗ്രഹമുണ്ടെന്ന് നടൻ വിജയ് സേതുപതി. നിരവധി കഥകൾ വരാറുണ്ടെങ്കിലും സമയപ്രശ്നം കാരണമാണ് താമസിക്കുന്നതെന്നും നടൻ പറഞ്ഞു. വിജയ് സേതുപതിയുടെ 50-ാം സിനിമയായ മഹാരാജയുടെ പ്രമോഷനിടെയായിരുന്നു ഇക്കാര്യം പറഞ്ഞത്.
മലയാളം സിനിമകൾ വളരെ ഇഷ്ടമാണ്. മലയാളത്തിലെ സൂപ്പർ സ്റ്റാറുകളായ മോഹൻലാലിനോടും മമ്മൂട്ടിയോടൊപ്പവും അഭിനയിക്കാൻ ആഗ്രഹമുണ്ട്. ഡേറ്റ് പ്രശ്നം കാരണമാണ് താമസമുണ്ടാകുന്നത്. മലയാളത്തിൽ നിന്നും നിരവധി സംവിധായകരുടെ കഥയും കേൾക്കും. മലയാള സിനിമയിൽ അഭിനയിച്ച് മലയാളം സംസാരിക്കാൻ അതിയായ ആഗ്രഹമുണ്ടെന്നും വിജയ് സേതുപതി പറഞ്ഞു.
കേരളവും മലയാളികളും മനോഹരമാണ്. കലയ്‌ക്കും കലാകാരനും അതിരുകളില്ലെന്നാണ് ഞാൻ വിശ്വസിക്കുന്നത്. ടർബോ സിനിമയുടെ രണ്ടാം ഭാഗം വരുന്നുണ്ടെന്ന് അറിഞ്ഞു. മമ്മൂട്ടി ക്ഷണിച്ചാൽ സിനിമയിൽ അഭിനയിക്കും. മമ്മൂട്ടിയുടെ നൻപകൽ നേരത്ത് മയക്കം കണ്ടിരുന്നു. നല്ലൊരു സിനിമയാണ് മമ്മൂട്ടി നന്നായി അഭിനയിച്ചിട്ടുണ്ടെന്നും നടൻ വ്യക്തമാക്കി.
അഭിനയ രംഗത്ത് നായകനെന്നും പ്രതിനായകനെന്നുമുള്ള വേർതിരിവ് ഞാൻ സ്വീകരിച്ചിട്ടില്ല. അഭിനയം വളരെ എളുപ്പമാണെന്നോ കഠിനമാണെന്നോ പറയാൻ സാധിക്കില്ലെന്നും വിജയ് സേതുപതി കൂട്ടിച്ചേർത്തു. മഹാരാജയുടെ പ്രമോഷനുവേണ്ടി തിരുവനന്തപുരം ലുലുമാളിലാണ് വിജയ് സേതുപതി അടക്കമുള്ള സിനിമയുടെ അണിയറപ്രവർത്തകർ എത്തിയത്.
