ലോകത്തിൽ ഇതുവരെ രേഖപ്പെടുത്തിയിട്ടുള്ളതിൽ വച്ച് ഏറ്റവും ശക്തിയേറിയ ചുഴലിക്കാറ്റ് ബെറിൽ ചുഴലിക്കാറ്റിൽ കരീബിയൻ രാജ്യങ്ങൾ വിറങ്ങലിച്ചിരിക്കുകയാണ്. ദുരിതം വിതച്ച ചുഴലിക്കാറ്റ് ജമൈക്കൻ തീരത്തേക്ക് അടുക്കുകയാണ്. കൊടുങ്കാറ്റിന്റെ ഏറ്റവും ഉയർന്ന് വിഭാഗമായ കാറ്റഗറി-5-ലാണ് ബെറിൽ ഉൾപ്പെട്ടിട്ടുള്ളത്.
കാറ്റ് ദിശ മാറുമ്പോഴും നഷ്ടങ്ങളുടെ ഇരുണ്ട പാത അവശേഷിക്കുകയാണ്. യൂണിയൻ ഐലൻഡിൽ വീശിയടിച്ച ബെറിൽ ദ്വീപിനെയൊന്നാകെ ശിഥിലമാക്കി. സെൻ്റ് വിൻസെൻ്റിനും ഗ്രനേഡൈൻസിനും സമീപം സ്ഥിതി ചെയ്യുന്ന ദ്വീപിലെ മിക്ക കെട്ടിടങ്ങളും തകർന്നു. ചിലത് നിലം പൊത്താറായി നിൽക്കുന്നു. ഭീതി വീശിയിച്ച ഇരുണ്ട രാത്രിയെ നേരിട്ടതിന്റെ ഞെട്ടലിലാണ് ജനങ്ങൾ.
ദ്വീപിലെ ജനങ്ങൾ എല്ലാവരുടെയും വീടുകൾ കാറ്റെടുത്തെന്ന് കത്രീന കോയ് എന്ന യുവതി വീഡ‍ിയോ സന്ദേശത്തിൽ പറയുന്നു. റോഡുകളിൽ ഇറങ്ങാൻ സാധിക്കുന്നില്ലെന്നും വൈദ്യുതി ബന്ധം നഷ്ടമായെന്നും അവർ പറഞ്ഞു. 1985 മുതൽ ദ്വീപിൽ കഴിയുന്ന മത്സ്യത്തൊഴിലാളിയായ സെബാസ്റ്റ്യൻ സെയ്‌ലിയും ചുഴലിയുടെ ആഘാതത്തിൽ നിന്ന് മുക്തനായിട്ടില്ല. 2004-ൽ ഇവാൻ ചു‌ഴലിക്കാറ്റിനെയും അതിജീവിച്ച അദ്ദേഹം, ബെറിൽ ചുഴലി മറ്റൊരു തരത്തിലാണ് വീശിയടിച്ചതെന്ന് പറയുന്നു. ബെറിൽ ചുഴിലക്കാറ്റിനെ അതിജീവിച്ച സാഹചര്യം പറയുമ്പോൾ പലരുടെയും കണ്ഠമിടറുന്നു.
ഹോട്ടൽ ഉടമയായ അലിസിയും ചുഴലിക്കാറ്റിന്റെ തീവ്രത വിവരിക്കുന്നു. കാറ്റിന്റെ ശക്തിയിൽ മേൽക്കൂര പിളർന്ന അടുത്തുള്ള കെട്ടിടത്തിലേക്ക് വീഴുന്നതിന്റെ ശബ്ദം കേൾക്കാമായിരുന്നുവെന്ന് അദ്ദേഹം പറയുന്നു. ഉറുമ്പ് സ്വരുകൂട്ടും പോലെ ഉണ്ടാക്കിയെടുത്തത് നിമിഷങ്ങൾക്കുള്ളിൽ തകർന്നടിയുന്നതിന്റെ ദുഃഖത്തിലും അങ്കാലാപ്പിലുമായിരുന്നു ജനങ്ങൾ.
മണിക്കൂറിൽ 240 കിലോമീറ്റർ വേഗതയിലാണ് കാറ്റ് വീശുന്നത്. ഗ്രെനഡയിലെ കാരിയാകു, പെറ്റൈറ്റ് മാർട്ടിനിക് ദ്വീപുകളിലാണ് ഏറ്റവും കൂടുതൽ നാശനഷ്ടമുണ്ടായത്. ബെറിൽ ചുഴലിക്കാറ്റ് ജമൈക്കയിലേക്ക് അടുങ്ങുന്നുവെന്നാണ് യുഎസ് നാഷണൽ ഹറികെയ്ൻ സെൻ്റർ (NHC) പറയുന്നത്.
2017-ൽ വീശിയടിച്ച മരിയ ചുഴലിക്കാറ്റാണ് ഇതിന് മുൻപ് മേഖലയെ ബാധിച്ച ഏറ്റവും വലിയ ചുഴലിക്കാറ്റ്. ഡൊമിനിക്ക, പ്യൂർട്ടോ റിക്കോ, യുഎസ് വിർജിൻ ഐലൻഡ്‌സ്, കരീബിയയുടെ മറ്റ് ഭാഗങ്ങൾ എന്നിവിടങ്ങളിൽ വൻ നാശനഷ്ടങ്ങളാണ് മരിയ ചുഴലിക്കാറ്റ് സൃഷ്ടിച്ചത്. കാറ്റഗറി-5-ൽ പെട്ട മരിയ ചുഴലിക്കാറ്റ് 3,059 പേരുടെ ജീവനാണ് കവർന്നത്. 2,975 മരണവും പ്യൂർട്ടോ റിക്കോയിലായിരുന്നു.
