ഇന്ത്യൻ ക്രിക്കറ്റ് താരം വിരാട് കോലിയുടെ പേരിൽ മറ്റൊരു റെക്കോർഡ് കൂടി. എന്നാൽ ഇത്തവണ കളത്തിലല്ല മറിച്ച് ഇൻസ്റ്റാഗ്രാമിലാണ് കോലി റെക്കോർഡ് നേടിയിരിക്കുന്നത്.
ടി20 ലോകകപ്പ് നേടിയതിന് പിന്നാലെ വിരാട് കോലി ഇൻസ്റ്റഗ്രാമിൽ പങ്കുവെച്ച ഫോട്ടോകളുടെ പോസ്റ്റിന് ഇപ്പോൾ 20 മില്യൺ ലൈക്കുകളാണ് ലഭിച്ചത്. വിജയത്തിന് മണിക്കൂറുകൾക്ക് ശേഷം അദ്ദേഹം ഹൃദയംഗമമായ സന്ദേശങ്ങൾ പങ്കിടുകയും നിരവധി ഫോട്ടോകൾ പോസ്റ്റ് ചെയ്യുകയും ചെയ്തു. സഹതാരങ്ങളും ട്രോഫിയുമായി ആഘോഷിക്കുന്നതടക്കമുള്ള ചിത്രങ്ങൾ കോലി പങ്ക് വച്ചു.
“ ഇതിലും നല്ല ഒരു ദിവസം സ്വപ്നം കാണാൻ കഴിഞ്ഞില്ല. ദൈവം വലിയവനാണ്, നന്ദിയോടെ ഞാൻ തല കുനിക്കുന്നു. ” എന്ന കുറിപ്പും ചിത്രത്തിനൊപ്പമുണ്ടായിരുന്നു. റെക്കോർഡ് ലൈക്കുകളാണ് ഈ ഫോട്ടോകൾക്ക് ലഭിച്ചിരിക്കുന്നത്.
ഇതോടെ ഏറ്റവും കൂടുതൽ ഇൻസ്റ്റാഗ്രാം ലൈക്കുകൾ നേടുന്ന ലോകത്തെ ആദ്യ ക്രിക്കറ്റ് താരമായി വിരാട് കോലി . ഏഷ്യയിൽ ഏറ്റവുമധികം ലൈക്ക് ചെയ്ത ഇൻസ്റ്റാഗ്രാം പോസ്റ്റുകളിൽ ഇത് രണ്ടാം സ്ഥാനത്താണ്.ഈ പട്ടികയിൽ ഒന്നാം സ്ഥാനത്തുള്ളത് കൊറിയൻ പോപ്പ് ഗായകൻ ബിടിഎസിലെ കിം താഹ്യുങ്ങാണ്. ഇപ്പോൾ 20 ദശലക്ഷം ലൈക്കുകളുമായി വിരാട് കോഹ്ലി ഈ നേട്ടം കൈവരിക്കുന്ന രണ്ടാമത്തെ ഏഷ്യൻ സെലിബ്രിറ്റിയായി മാറി. ഒരു ഇൻസ്റ്റാഗ്രാം പോസ്റ്റിന് 2 കോടി ലൈക്കുകൾ നേടുന്ന ആദ്യ ക്രിക്കറ്റ് താരമായും അദ്ദേഹം മാറി.
ഇൻസ്റ്റാഗ്രാമിന്റെ ചരിത്രത്തിൽ ഏറ്റവും കൂടുതൽ ലൈക്ക് ലഭിച്ച പോസ്റ്റ് ലയണൽ മെസ്സിയുടെതാണ്. 2022 ഫുട്ബോൾ ലോകകപ്പ് നേടിയതിന് ശേഷം മെസ്സി പങ്കിട്ട ഫോട്ടോയ്ക്ക് 75 ദശലക്ഷം ലൈക്കുകൾ ലഭിച്ചു. ഇൻസ്റ്റാഗ്രാമിൽ ഏറ്റവും കൂടുതൽ ലൈക്ക് ലഭിച്ച പോസ്റ്റാണിത്.
