മലയാളികൾക്ക് എത്ര കണ്ടാലും മതിവരാത്ത ചില സിനിമകളുടെ പട്ടിക എടുത്താൽ അതിൽ ‘മീശമാധവനും’ ഉണ്ടാകും. രുഗ്മിണിയും മാധവനും സരസുവും അഡ്വ മുകുന്ദനുണ്ണിയും ഭഗീരതൻ പിള്ളയും സുഗുണനുമൊക്കെ സിനിമാ പ്രേക്ഷകർക്ക് ഏറെ പ്രിയപ്പെട്ടവരാണ്. മീശമാധവൻ പുറത്തിറങ്ങിയിട്ട് ഇന്നലെ 22 വർഷം തികഞ്ഞു.
22 വർഷം തികഞ്ഞ സിനിമയുടെ ഓർമകൾ പങ്കുവച്ചിരിക്കുകയാണ് കാവ്യാ മാധവൻ. ദിലീപിനെയും ലാൽജോസിനെയും മെൻഷൻ ചെയ്തുകൊണ്ടാണ് സിനിമയുടെ പോസ്റ്റർ പങ്കുവച്ചത്. സിനിമ തിയേറ്ററുകളിൽ 250 ദിവസം പൂർത്തിയാക്കിയപ്പോൾ ഇറക്കിയ പോസ്റ്ററുംഇതിനോടൊപ്പമുണ്ട്. കാവ്യയുടെ പോസ്റ്റ് നിമിഷ നേരത്തിനുള്ളിൽ വൈറലായി.
ഭൂമിയിലുള്ള മറ്റൊന്നിനു വേണ്ടിയും മാധവൻ നിന്നെ ഉപേക്ഷിക്കാൻ തയ്യാർ അല്ല, മാധവൻ കട്ടത് ഒന്നും ചേക്ക് വിട്ട് പോയിട്ടില്ല…… വേറെ ലെവൽ പടമാണ്… പാട്ടും പൊളിയാ, പിള്ളേച്ഛനും സരസുവിനും ഒന്നിക്കാൻ പറ്റിയില്ലല്ലോ എന്നൊരു സങ്കടം മാത്രമേയുള്ളൂ എന്നിങ്ങനെ നിരവധി കമന്റുകളാണ് പോസ്റ്റിന് താഴെ വരുന്നത്.
2002 ജൂലൈ 4-നാണ് ചിത്രം തിയേറ്ററിലെത്തിയത്. രഞ്ജന് പ്രമോദിന്റെ തിരക്കഥയിൽ ചിത്രം സംവിധാനം ചെയ്തത് ലാൽ ജോസാണ്. കാവ്യ മാധവനും ദിലീപിനും പുറമേ ജഗതി ശ്രീകുമാര്, കൊച്ചിന് ഹനീഫ, ഹരിശ്രീ അശോകന്, ഇന്ദ്രജിത്ത് സുകുമാരന് എന്നിങ്ങനെ വമ്പന്താരനിര അണിനിരന്ന ചിത്രമായിരുന്നു ഇത്.
