ന്യൂഡല്ഹി : ടി20 ലോകകപ്പ് നേടിയതിന് പിന്നാലെ ഉഡുപ്പി ദേവീക്ഷേത്രത്തിൽ ദർശനം നടത്തി ഇന്ത്യൻ ക്രിക്കറ്റ് താരം സൂര്യകുമാർ യാദവ് . ഭാര്യ ദേവിഷ ഷെട്ടിക്കൊപ്പം ഉഡുപ്പിയിലെത്തിയ സൂര്യകുമാർ കാപ്പുവിലെ ഉഡുപ്പി കാപ്പു ശ്രീ മാരികാംബ ക്ഷേത്രത്തിലാണ് ദർശനം നടത്തിയത് . പ്രത്യേക പൂജകളും ഇരുവരുടെയും പേരിൽ നടത്തി.
ഇന്ത്യൻ ടീം ലോകകപ്പ് കിരീടം നേടണമെന്ന് സൂര്യകുമാർ യാദവിന് ഏറെ ആഗ്രഹമുണ്ടായിരുന്നുവെന്നും , അതിനായി പ്രാർത്ഥിച്ചിരുന്നുവെന്നും സൂര്യകുമാറിനൊപ്പമുണ്ടായിരുന്ന സുഹൃത്ത് പറയുന്നു. ഈ ആഗ്രഹം സഫലമാക്കിയതിന് നന്ദി പറയാനാണ് അദ്ദേഹം ഇപ്പോൾ കാപ്പുവിലെ ക്ഷേത്രത്തിലെത്തിയത്.
ക്ഷേത്ര ദർശനത്തിനെത്തിയ സൂര്യകുമാർ യാദവിന് വൻ വരവേൽപ്പാണ് ലഭിച്ചത് . ദേവിഷ ഷെട്ടിയുടെ മാതാപിതാക്കൾ തുളുനാട് സ്വദേശികളാണ്. 40 കോടിയോളം രൂപ ചെലവിൽ ശ്രീ മാരികാംബ ക്ഷേത്രത്തിൽ പുനരുദ്ധാരണം നടക്കുകയാണ്. ഇതിനെ കുറിച്ചും സൂര്യകുമാർ വിവരങ്ങൾ ആരാഞ്ഞു.
ടി20 ലോകകപ്പ് ഫൈനലില് ദക്ഷിണാഫ്രിക്കന് താരം ഡേവിഡ് മില്ലറിനെ അദ്ഭുതകരമാംവിധമാണ് സൂര്യകുമാര് പുറത്താക്കിയത്. അതുവഴി ഇന്ത്യ 13 വര്ഷങ്ങള്ക്ക് ശേഷം വീണ്ടുമൊരിക്കല്ക്കൂടി ടി20 ലോകകപ്പ് ചാമ്പ്യന്മാരായി.
