കരുനാഗപ്പളളി: കരുനാഗപ്പള്ളിയിയിൽ ഷോപ്പിംഗ് മാൾ ഉദ്ഘാടനത്തിന് എത്തിയ രശ്മിക മന്ദാനയെ കാണാൻ ഇരച്ചെത്തി ജനക്കൂട്ടം. കരുനാഗപ്പള്ളിയിലെ വെഡ്‌സ്ഇന്ത്യ ഷോപ്പിംഗ് മാളിന്റെ ഉദ്ഘാടനത്തിന് എത്തിയതായിരുന്നു താരം. ഉദ്ഘാടന ചടങ്ങുകൾക്കിടയിൽ മലയാളത്തിൽ ഓണാശംസകൾ നേർന്ന ശേഷമാണ് രശ്മിക വേദി വിട്ടത്.
കൊച്ചി നെടുമ്പാശ്ശേരി വിമാനത്താവളത്തിൽ രാവിലെ 9 മണിക്ക് വന്നിറങ്ങിയ താരം സാജ് കൺവെൻഷൻ സെന്ററിലെ ഹെലിപാഡിൽ നിന്ന് കരുനാഗപ്പള്ളിയിലേക്ക് പോവാനായിരുന്നു ആദ്യം തീരുമാനിച്ചത്. എന്നാൽ കാലാവസ്ഥ അനുകൂലമല്ലാത്തതിനാൽ വിമാനത്താവളത്തിൽ നിന്നും ഹെലികോപ്ടറിൽ വള്ളിക്കാവ് മൈതാനത്ത് വന്നിറങ്ങി. അവിടെ നിന്നും കാർമാർഗം ‘വെഡ്‌സ്ഇന്ത്യ’ ഷോപ്പിംഗ് മാളിലേക്ക് എത്തുകയായിരുന്നു.
തിരിച്ച് നെടുമ്പാശേരിയിലെത്തി വൈകുന്നേരത്തെ ഫ്‌ലൈറ്റിൽ മടങ്ങുകയും ചെയ്തു. രണ്ട് വർഷത്തിന് ശേഷമാണ് രശ്മിക കേരളത്തിലെത്തുന്നത്. ഗീതാഗോവിന്ദം, സുൽത്താൻ, പുഷ്പാ, സീതാരാമം, വാരിസ്, ആനിമൽ എന്നീ സൂപ്പർഹിറ്റ് ചിത്രങ്ങളിലെ മികച്ച പ്രകടനത്തിലൂടെയാണ് രശ്മിക കേരളത്തിൽ കൂടുതൽ ആരാധകവൃന്ദം സൃഷ്ടിച്ചത്.
പുഷ്പ രണ്ടാം ഭാഗം, സിക്കന്ദർ, റെയിൻ ബോ, ദി ഗേൾ ഫ്രണ്ട് എന്നിവയാണ് രശ്മികയുടേതായി റിലീസിനൊരങ്ങുന്ന ചിത്രങ്ങൾ.
