ന്യൂഡൽഹി: ലൈംഗികാതിക്രമ പരാതിയിൽ മേൽ സർവകലാശാലയുടെ ആഭ്യന്തര സമിതി നടത്തിയ അന്വേഷണത്തിനു പിന്നാലെ ജവഹർലാൽ നെഹ്‌റു സർവകലാശാലയിലെ (ജെഎൻയു) പ്രൊഫസറെ പിരിച്ചുവിട്ടു. കോൺഗ്രസ് എംപിയും മണിപ്പൂരിൽ നിന്നും ലോക്‌സഭാംഗവുമായ അംഗോംച ബിമോൾ അകോയ്ജാമിനെയാണ് സർവീസിൽനിന്ന് പുറത്താക്കിയത്. വൈസ് ചാൻസലർ ശാന്തിശ്രീ ഡി. പണ്ഡിറ്റാണ് ഇത് സംബന്ധിച്ച് ഉത്തരവിറക്കിയത്.
സാമൂഹിക ശാസ്ത്ര വിഭാഗത്തിന് കീഴിലുള്ള സെന്റർ ഫോർ ദ സ്റ്റഡി ഓഫ് സോഷ്യൽ സിസ്റ്റംസിൽ അധ്യാപകനായിരുന്നു അംഗോംച ബിമോൾ. പരാതികൾ പരിശോധിച്ച ആഭ്യന്തര സമിതി കടുത്ത അച്ചടക്ക നടപടി ശുപാർശ ചെയ്തിരുന്നു.
അകോയ്ജാമിനെതിരെ 11 വിദ്യാർഥിനികൾ ലൈംഗികാതിക്രമ പരാതി നൽകിയിരുന്നു. മേയ് മാസത്തിലാണ് പരാതികൾ സർവകലാശാലയുടെ ആഭ്യന്തര സമിതിക്ക് ലഭിച്ചത്. തുടർന്ന് വിദ്യാർഥിനികളുടെ മൊഴികൾ രേഖപ്പെടുത്തുകയും അന്വേഷണം ആരംഭിക്കുകയും ചെയ്തു.
റിപ്പോർട്ട് തേടി വനിതാ കമ്മീഷൻ
വിദ്യാർഥിനികളുടെ പരാതിയിൽ സർവകലാശാല സ്വീകരിച്ച നടപടികളെക്കുറിച്ച് ഡൽഹി വനിതാ കമ്മീഷനും റിപ്പോർട്ട് തേടിയിരുന്നു. പരാതിയിൽ അന്വേഷണം ആരംഭിച്ചെങ്കിലും തുടർനടപടികളുടെ വിശദാംശങ്ങൾ പുറത്തുവന്നിട്ടില്ലെന്ന സാഹചര്യത്തിലായിരുന്നു ഇടപെടൽ. ആഭ്യന്തര സമിതിയുടെ നടപടികളും സ്വീകരിച്ച നടപടികളുടെ വിവരങ്ങളും മൂന്ന് ദിവസത്തിനകം സമർപ്പിക്കാൻ വൈസ് ചാൻസലറോട് ആവശ്യപ്പെട്ടിരുന്നു.
