ബെംഗളൂരു: യൂട്യൂബർ ധ്രുവ് റാഠിയുടെ പൗരത്വവും വിസാ വ്യവസ്ഥകളും പരിശോധിക്കണമെന്ന് ആവശ്യപ്പെട്ട് കേന്ദ്ര ആഭ്യന്തര മന്ത്രാലയത്തിന് പരാതി. മുൻ ഐപിഎസ് ഉദ്യോഗസ്ഥനും ബിജെപി നേതാവുമായ ഭാസ്കർ റാവുവാണ് കേന്ദ്ര ആഭ്യന്തര സെക്രട്ടറിക്ക് കത്തയച്ചത്. റാഠി ജർമൻ പൗരനാണെന്നും ഇന്ത്യയിലെത്തിയതും രാഷ്‌ട്രീയ പ്രതിഷേധത്തിൽ പങ്കെടുത്തതും നിലവിലുള്ള നിയമങ്ങൾക്കും വിസാ വ്യവസ്ഥകൾക്കും അനുസൃതമാണോയെന്ന് പരിശോധിക്കണമെന്നാണ് പരാതിയെ പ്രധാന ആവശ്യം.
വിദേശ പൗരന്റെ രാഷ്‌ട്രീയ പ്രതിഷേധത്തിലെ പങ്കാളിത്തം നിയമപരമാണോയെന്ന് പരിശോധിക്കണമെന്നും പരാതിയിൽ ആവശ്യപ്പെട്ടിട്ടുണ്ട്. ഒക്ടോബർ എട്ടിന് ബെംഗളൂരുവിലെ ഫ്രീഡം പാർക്കിൽ നടന്ന പ്രതിഷേധത്തിലാണ് ധ്രുവ് റാഠി പങ്കെടുത്തത്. മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടും വോട്ടർപട്ടികയുടെ പ്രത്യേക തീവ്ര പരിഷ്‌കരണമായ SIR പിൻവലിക്കണമെന്ന് ആവശ്യപ്പെട്ടുമായിരുന്നു പരിപാടി. നടനും ആക്ടിവിസ്റ്റുമായ പ്രകാശ് രാജും പ്രതിഷേധത്തിൽ പങ്കെടുത്തിരുന്നു.
റാഠിക്ക് ഓവർസീസ് സിറ്റിസൺ ഓഫ് ഇന്ത്യ (OCI) കാർഡോ മറ്റേതെങ്കിലും പ്രത്യേക പദവിയോ ഉണ്ടോയെന്ന് പരിശോധിക്കണമെന്നാണ് കത്തിലെ മറ്റൊരു ആവശ്യം. മുൻ സന്ദർശനങ്ങളിൽ സമാനമായ രാഷ്‌ട്രീയ പരിപാടികളിൽ പങ്കെടുത്തിട്ടുണ്ടോയെന്നും അത്തരം പങ്കാളിത്തം വിസാ വ്യവസ്ഥകൾക്ക് അനുസൃതമായിരുന്നോയെന്നും പരിശോധിക്കണമെന്നും പരാതിയിൽ ആവശ്യപ്പെട്ടിട്ടുണ്ട്.
