മുംബൈ: ജൂലൈ മാസത്തിൽ മാത്രം മുംബൈ നഗരത്തിൽ ലഭിച്ചത് റെക്കോർഡ് മഴ. 1951 ൽ ജൂലൈ മാസത്തിൽ (1703.7)മില്ലീമീറ്റർ മഴ ലഭിച്ചിരുന്നു. ഇതിന് ശേഷം നഗരത്തിലെ ഏറ്റവും ഉയർന്ന രണ്ടാമത്തെ മഴയാണ് ഇക്കുറി ജൂലൈയിൽ ലഭിച്ചതെന്ന് കണക്കുകൾ വ്യക്തമാക്കുന്നു.
ഈ വർഷം ജൂലൈയിൽ മൊത്തം 1564 മില്ലീമീറ്ററാണ് രേഖപ്പെടുത്തിയത്. സാധാരണ 840.6 മില്ലീമീറ്റർ മഴയാണ് ജൂലൈയിൽ ലഭിക്കാറുള്ളത്. ഓഗസ്റ്റ് 3 മുതൽ മുംബൈയിൽ മഴ വീണ്ടും കൂടിയേക്കുമെന്നും കാലാവസ്ഥാ വിഭാഗം അറിയിച്ചു. എന്നാൽ ഇത് മുൻ ആഴ്ചയിലെ മഴയെക്കാൾ കുറവായിരിക്കുമെന്നും ഐഎംഡി അറിയിച്ചു.
ഓഗസ്റ്റ് 3 ന് താനെയുടെയും പാൽഘറിന്റെയും ചില ഭാഗങ്ങളിൽ കാലാവസ്ഥാ വകുപ്പ് ഓറഞ്ച് അലർട്ട് പ്രഖ്യാപിച്ചിട്ടുണ്ട്, ചില സ്ഥലങ്ങളിൽ ശക്തമായതോ അതിശക്തമായതോ ആയ മഴ പെയ്യുമെന്ന് മുന്നറിയിപ്പ് നൽകിയിട്ടുണ്ട്. പടിഞ്ഞാറൻ കാറ്റിന്റെ ശക്തി കൂടിയതാണ് ഈ മുന്നറിയിപ്പിന് കാരണം.
വലിയ മഴക്കെടുതിയാണ് ജൂലൈ അവസാനത്തോടെ മുംബൈയിലും മഹാരാഷ്ട്രയിലും ഉണ്ടായത്. ശക്തമായ മഴയിൽ ദിവസങ്ങളോളം മുംബൈ നഗരം ഉൾപ്പെടെ വെളളത്തിൽ മുങ്ങിയിരുന്നു.
