ലക്നൗ: നോർത്തേൺ റെയിൽവേയിലെ ലക്നൗ ഡിവിഷനിലുള്ള എട്ട് റെയിൽവേ സ്റ്റേഷനുകളുടെ പേര് മാറ്റിയതായി അധികൃതർ. സ്വാതന്ത്ര്യ സമര സേനാനികളുടേയും മഹത് വ്യക്തിത്വങ്ങളുടേയും പേരുകളാണ് സ്റ്റേഷനുകൾക്ക് പുതിയതായി നൽകിയിരിക്കുന്നത്. റെയിൽവേയുടെ റിപ്പോർട്ടുകൾ അനുസരിച്ച് കാസിംപൂർ ഹാൾട്ട് റെയിൽവേ സ്റ്റേഷൻ ഇനി ജെയ്സ് സിറ്റി റെയിൽവേ സ്റ്റേഷൻ എന്ന് അറിയപ്പെടും.
നിഹാൽഗഡ് റെയിൽവേ സ്റ്റേഷന്റെ പേര് മഹാരാജ ബിജിലി പാസി റെയിൽവേ സ്റ്റേഷൻ, അക്ബർഗഞ്ചിനെ മാ അഹോർവ ഭവാനി ധാം, വാരിസ്ഗഞ്ചിനെ അമർ ഷാഹിദ് ഭലേ സുൽത്താൻ, ഫുർസത്ഗഞ്ചിനെ തപേശ്വർനാഥ് ധാം, ബനിയെ സ്വാമി പരമൻസ്, മിസറൗലിയെ മാ കാലികൻ ധാം, ജെയ്സ് റെയിൽവേ സ്റ്റേഷന് ഗുരു ഗോരഖ്നാഥ് ധാം എന്നിങ്ങനെയാണ് പേരുകൾ മാറ്റിയത്. അമേഠിയുടെ സാംസ്കാരിക പാരമ്പര്യം സംരക്ഷിക്കണമെന്ന മുൻ എംപി സ്മൃതി ഇറാനിയുടെ ആവശ്യം പരിഗണിച്ചാണ് സ്റ്റേഷനുകളുടെ പേരുകൾ മാറ്റിയത്.
റെയിൽവേ സ്റ്റേഷന്റെ പേരുകൾ മാറ്റുന്നത് സംബന്ധിച്ച് സ്മൃതി ഇറാനി സമൂഹമാദ്ധ്യമത്തിൽ നേരത്തേയും കുറിപ്പ് പങ്കുവച്ചിരുന്നു. ഗുരു ഗോരഖ്നാഥ് ധാം ആശ്രമം ജെയ്സ് സ്റ്റേഷന് സമീപത്ത് ആയതിനാലാണ് ആശ്രമത്തിന്റെ പേരിലേക്ക് മാറ്റിയത്. മിസറൗലി, ബാനി, അക്ബർഗഞ്ച്, ഫുർസത്ഗഞ്ച് റെയിൽവേ സ്റ്റേഷനുകൾക്ക് സമീപമുള്ള പുണ്യസ്ഥലങ്ങളുടെ പേരുകളിലാണ് അവ പുനർനാമകരണം ചെയ്തിരിക്കുന്നത്.
കർഷക ഗ്രാമവും പാസി ജനവിഭാഗം കൂടുതലായി താമസിക്കുന്നതുമായി ഇടത്താണ് നിഹാൽഗഡ് സ്റ്റേഷൻ സ്ഥിതി ചെയ്യുന്നത്. അതുകൊണ്ടാണ് അവരുടെ സമുദായത്തിൽ നിന്നുള്ള രാജാവായ മഹാരാജ ബിജിലി പാസിയുടെ പേര് സ്റ്റേഷന് നൽകിയത്. 1857ൽ ബ്രിട്ടീഷുകാർക്കെതിരെ പോരാടിയ ധീരനായ ഭലേ സുൽത്താന്റെ പേരിലാണ് വാരിസ്ഗഞ്ച് പ്രശസ്തമായത്. അത് പരിഗണിച്ച് സ്റ്റേഷനും അദ്ദേഹത്തിന്റെ പേര് നൽകിയതായി ഉദ്യോഗസ്ഥർ വ്യക്തമാക്കി.
