റിയാദ്: സൗദി അറേബ്യയിൽ വാഹനങ്ങൾ തമ്മിൽ കൂട്ടിയിടിച്ചുണ്ടായ അപകടത്തിൽ രണ്ട് ഇന്ത്യക്കാർ മരിച്ചു. ജുബൈൽ ട്രാഫിക് പരിധിക്ക് പുറത്ത് അബു ഹൈദ്രിയ റോഡിൽ തബ്‌ലൈൻ പാലത്തിന് സമീപമാണ് അപകടമുണ്ടായത്. മഹീന്ദ്ര പിക്കപ്പും മെഴ്‌സിഡസ് ട്രെയ്‌ലറും തമ്മിൽ കൂട്ടിയിടിയ്‌ക്കുകയായിരുന്നു. അപകടത്തിൽ പിക്കപ്പിൽ യാത്രചെയ്തിരുന്ന മുബരിക് ഖാൻ സലിം ഖാൻ (24), സമീർ അലി മക്ബൂൽ ഖാൻ (26) എന്നിവരാണ് മരിച്ചത്.
ട്രെയ്‌ലർ ഓടിച്ചത് പാകിസ്താനി പൗരനാണെന്നാണ് വിവരം. മുബരിക് ഖാൻ ഡ്രൈവറായും സമീർ അലി സെയിൽസ്മാനായുമാണ് ജോലി ചെയ്തിരുന്നത്. ഇവർ ഏത് സംസ്ഥാനക്കാരാണെന്ന് അറിവായിട്ടില്ല. മൃതദേഹങ്ങൾ അൽ നാരിയ ജനറൽ ആശുപത്രിയിൽ സൂക്ഷിച്ചിരിക്കുകയാണ്. ഔദ്യോഗിക നടപടികൾക്കായി പ്രവാസി വെൽഫെയർ ജനസേവന വിഭാഗം കൺവീനർ സലിം ആലപ്പുഴ രംഗത്തുണ്ട്.
