അണലി എന്ന് കേട്ടാൽ നാം അടിമുടി വിറയ്ക്കും. ഇന്ത്യയിൽ പാമ്പ് കടിയേറ്റ് മരിക്കുന്നവരുടെ എണ്ണം എടുത്താൽ അതിൽ ഏറ്റവും കൂടുതൽ ആൾക്കാർ മരിച്ചിരിക്കുന്നത് അണലിയുടെ വിഷം ഉള്ളിൽ ചെന്നാണ്. ഇന്ത്യയിൽ ഏറ്റവും കൂടുതൽ കാണപ്പെടുന്ന അണലി വർഗ്ഗത്തിൽ പെട്ട പാമ്പ് ചേനത്തണ്ടനാണ്. ഈ വിഷ സർപ്പങ്ങളെ യൂറോപ്പ്, ഏഷ്യ, ആഫ്രിക്ക എന്നിവിടങ്ങളിൽ കണ്ടുവരുന്നു. നിലവിൽ ലോകമാകെ ഈ ഉപകുടുംബത്തിൽ 66 അണലി വർഗ്ഗങ്ങളെ കണ്ടെത്തിയിട്ടുണ്ട്. അതിൽ ഏറ്റവും ഭാരമേറിയ അണലി വർഗ്ഗം സബ് സഹാറൻ ആഫ്രിക്കൻ ഉൾപ്രദേശങ്ങളിൽ കാണുന്ന ഗബൂൺ അണലിയാണ്.
ഗാബൂൺ വൈപ്പർ അല്ലെങ്കിൽ ബിറ്റിസ് ഗബോണിക്ക, ഉപ-സഹാറൻ ആഫ്രിക്കയിൽ, പ്രത്യേകിച്ച് മഴക്കാടുകളിലും കൃഷിയിടങ്ങളിലും കാണുന്ന ഒരു മാരകമായ രാത്രികാല വിഷ പാമ്പാണ്. 4-6 അടി നീളവും 25 പൗണ്ട് വരെ ഭാരവുമുള്ള ഈ അണലി ഭൂഖണ്ഡത്തിലെ ഏറ്റവും ഭാരമേറിയ വിഷപ്പാമ്പാണ്.
എലികൾ, ഫ്രാങ്കോളിൻ പോലുള്ള പക്ഷികൾ, മുയലുകൾ, മംഗൂസുകൾ എന്നിവയുൾപ്പെടെ ചെറുതും ഇടത്തരവുമായ പല മൃഗങ്ങളെയും ഗാബൂൺ വേട്ടയാടി ഭക്ഷിക്കുന്നു. അപൂർവ സന്ദർഭങ്ങളിൽ ചെറിയ ഉറുമ്പുകളെയും ഇവ ആഹാരമാക്കാറുണ്ട്. സാമാന്യം വലിയ ത്രികോണാകൃതിയിലുള്ള തലയും ഇടുങ്ങിയ കഴുത്തുമുള്ള ഈ പാമ്പിന് ഒരു അമ്പിന്റെ ആകൃതിയാണ്.
മറ്റു വിഷപ്പാമ്പുകളെ വച്ച് നോക്കിയാൽ വേഗത കുറവാണെങ്കിലും ഏറ്റവും നീളമുള്ള വിഷപ്പല്ലുകളുള്ള പാമ്പുകളിൽ ഒന്നാണ് ഗാബൂൺ അണലി. ഇതിന്റെ മാരകമായ വിഷം ഇരകളെ നിമിഷ നേരം കൊണ്ട് കൊല്ലുന്നു. വളരെ ശ്രദ്ധിച്ചു വേണം ഈ പാമ്പ് വസിക്കുന്ന ഇടങ്ങളിലൂടെ സഞ്ചരിക്കാൻ. എന്തെന്നാൽ ഗാബൂൺ അണലിയെ കണ്ടുപിടിക്കാൻ വളരെ ബുദ്ധിമുട്ടാണ്. ഒരുതരത്തിൽ പറഞ്ഞാൽ വേഷപ്രച്ഛന്നനാണ് ഈ പാമ്പ്. തവിട്ട്, മഞ്ഞ, ധൂമ്രനൂൽ എന്നീ നിറങ്ങളിൽ ത്രികോണ ആകൃതിയിലുള്ള പാറ്റേണുകളാണ് ഇവയുടെ ശരീരത്തിന്. അതിനാൽ തന്നെ ഇലകൾക്കിടയിൽ കിടന്നാൽ കണ്ടുപിടിക്കുക അസാധ്യം. പരിചയസമ്പന്നരായ ഹെർപെറ്റോളജിസ്റ്റുകൾക്ക് പോലും അണലിയെ അതിന്റെ സ്വാഭാവിക ആവാസവ്യവസ്ഥയിൽ കണ്ടെത്താൻ പ്രയാസമാണ്.
ഏറ്റവും നീളമുള്ള വിഷപ്പല്ലുള്ള(രണ്ടിഞ്ചുവരെ നീളം) ഗാബൂൺ പാമ്പിന്റെ ഒറ്റക്കടി മതി ആയുസ്സ് തീരാൻ. ഒറ്റക്കടിയിൽ ഏറ്റവുമധികം വിഷം ഇരയുടെ ശരീരത്തിലേക്ക് കുത്തിവെയ്ക്കുന്ന പാമ്പാണ് ഇവ. അവയുടെ വിഷ ഗ്രന്ഥികൾ വളരെ വലുതായതിനാൽ, വലിയ അളവിലുള്ള വിഷം ഉത്പാദിപ്പിക്കുന്നു. പഫ് ആഡെർ പോലുള്ള പല ആഫ്രിക്കൻ അണലികളിൽ നിന്ന് വ്യത്യസ്തമാണ് ഇവ. ഗബൂൺ വൈപ്പർ ഒരു കടിയ്ക്ക് ശേഷം വീണ്ടും അപ്പോൾ തന്നെ ആക്രമണം നടത്തുന്നില്ല. പക്ഷേ ഒറ്റക്കടിയിൽ, 200-1000 മില്ലിഗ്രാം വരെ വിഷമാണ് ഇവ കുത്തിവയ്ക്കുന്നത്. ചില പഠനങ്ങൾ അനുസരിച്ച് 2000 മില്ലിഗ്രാം വിഷം ഇതിന്റെ വിഷസഞ്ചിയിൽ ഉള്ളതായി പറയപ്പെടുന്നു.
