തിരുവനന്തപുരം: അദാനി ട്രിവാന്‍ട്രം റോയല്‍സ് വിജയവഴിയിൽ തിരിച്ചെത്തി. കൊച്ചി ബ്ലൂ ടൈഗേഴ്സ് മുന്നോട്ടുവെച്ച 132 റണ്‍സ് വിജയലക്ഷ്യം 19.5 ഓവറില്‍ 5 വിക്കറ്റ് നഷ്ടത്തില്‍ ട്രിവാന്‍ഡ്രം മറികടന്നു. ക്യാപ്റ്റന്‍ അബ്ദുള്‍ ബാസിത് പുറത്താവാതെ നേടിയ 50 റണ്‍സാണ് വിജയത്തിന് അടിത്തറയിട്ടത്. നായകൻ തന്നെയാണ് മത്സരത്തിലെ താരവും. ടോസ് നേടിയ ട്രിവാന്‍ഡ്രം കൊച്ചിയെ ബാറ്റിംഗിനയച്ചു. ട്രിവാന്‍ഡ്രം ക്യാപ്റ്റന്റെ തീരുമാനം ശരിവച്ച് ടി.എസ് വിനില്‍ എറിഞ്ഞ ആദ്യ ഓവറില്‍ തന്നെ കൊച്ചിയുടെ ഓപ്പണര്‍ ജോബിന്‍ ജോബി (1) യുടെ വിക്കറ്റ് നഷ്ടമായി. അബ്ദുള്‍ ബാസിതിന് ക്യാച്ച് നല്കിയാണ് ജോബിന്‍ പുറത്തായത്. അഞ്ജു ജോതി (15 ), ആനന്ദ് കൃഷ്ണന്‍ (6), ഷോണ്‍ റോജര്‍(20), പവന്‍ ശ്രീധര്‍(1) എന്നിവര്‍ പെട്ടെന്ന് പുറത്തായതോടെ കൊച്ചി 9.4 ഓവറില്‍ അഞ്ചിന് 48 എന്ന നിലയിലായി.
നിഖില്‍ തോട്ടത്ത്- സിജോമോന്‍ കൂട്ടുകെട്ട് ടീം സ്‌കോര്‍ 87ലെത്തിച്ചു. 18 പന്തില്‍ നിന്ന് 13 റണ്‍സെടുത്ത സിജോമോനെ ക്യാപ്റ്റന്‍ അബ്ദുള്‍ ബാസിത് പുറത്താക്കിയതോടെ കൊച്ചി കൂടുതല്‍ പ്രതിരോധത്തിലായി. 20 പന്തില്‍നിന്നും രണ്ട് സിക്‌സും നാലു ബൗണ്ടറിയും ഉള്‍പ്പെടെ 37 റണ്‍സെടുത്ത നിഖില്‍ തോട്ടത്തെ അബ്ദുള്‍ ബാസിത് ക്ലീന്‍ ബൗള്‍ഡാക്കി. ഉണ്ണികൃഷ്ണന്‍ മനുകൃഷ്ണന്‍(12), ബേസില്‍ തമ്പി(12) എന്നിവര്‍ക്ക് കാര്യമായ സംഭാവന ചെയ്യാനായില്ല.
132 റണ്‍സ് വിജയലക്ഷ്യവുമായി മറുപടി ബാറ്റിംഗിനിറങ്ങിയ ട്രിവാന്‍ഡ്രത്തിന് സ്‌കോര്‍ 36ൽ നിൽക്കെ ആദ്യ വിക്കറ്റ് നഷ്ടമായി. 16 റണ്‍സെടുത്ത റിയാ ബഷീറിനെ ഉണ്ണികൃഷ്ണന്റെ പന്തില്‍ സിജോമോന്‍ പുറത്താക്കി. ഉണ്ണികൃഷ്ണന്റെ ഇതേ ഓവറില്‍ ഗോവിന്ദ് പൈയും ഡക്കായി. പിന്നീട് കൂടുതൽ പരിക്കുകളില്ലാതെ ക്യാപ്റ്റന്‍ അബ്ദുള്‍ ബാസിദും എ.കെ ആകര്‍ഷും ചേര്‍ന്ന് ടീമിനെ വിജയത്തിലെത്തിച്ചു.
അവസാന ഓവറില്‍ നാലു റണ്‍സ് വിജയ ലക്ഷ്യം മുന്നിലുള്ളപ്പോള്‍ ഓവറിലെ രണ്ടാം പന്തില്‍ സിംഗിളെടുത്ത് ക്യാപ്റ്റന്‍ അബ്ദുള്‍ ബാസിത് അര്‍ദ്ധസെഞ്ച്വറി നേടി. 32 പന്തില്‍ അഞ്ചു സിക്‌സും ഒരു ബൗണ്ടറിയും ഉള്‍പ്പെടെയായിരുന്നു ഇന്നിംഗ്‌സ്. 25 റണ്‍സുമായി നിന്ന ആകര്‍ഷ് അവസാന ഓവറിലെ നാലാംപന്തില്‍ സിജോമോന്‍ ജോസഫിന്റെ ഗംഭീര ക്യാച്ചിലൂടെ പുറത്തായി. ഇതോടെ ഗ്യാലറികളിൽ ആകെ ആകാംക്ഷ നിറഞ്ഞു. എന്നാൽ ഒരു പന്ത് ബാക്കി നിൽക്കെ ജോഫിന്‍ അനൂപിന്റെ പന്ത് ബൗണ്ടറിയിലേക്ക് പായിച്ച് റോയല്‍സിന് വിജയം സമ്മാനിച്ചു.
