പ്രവാസി മലയാളികളുടെ ശ്രദ്ധയ്‌ക്ക്!! റോഡിൽ അഭ്യാസം വേണ്ട, പിഴയടച്ച് മുടിയും; അബുദാബി പൊലീസിന്റെ കർശന നിർദേശങ്ങൾ

അപകടകരമായി വാഹനമോടിക്കുന്നവർക്ക് മുന്നറിയിപ്പുമായി അബുദാബി പൊലീസ്. നിയമലംഘകർക്ക് കടുത്ത ശിക്ഷയാണ് ലഭിക്കുക.
പാർപ്പിട മേഖലകളിലൂടെ മറ്റുള്ളവർക്ക് പ്രയാസമുണ്ടാക്കുന്നവിധം വാഹനമോടിക്കുന്നവരുടെ എണ്ണം വർധിച്ച പശ്ചാത്തലത്തിലാണ് നിയമം കർശനമാക്കുന്നത്.

നിയമലംഘകർക്ക് 2,000 ദിർഹം പിഴ ചുമത്തും. കൂടാതെ, ലൈസൻസിൽ 12 ബ്ലാക്ക് പോയിന്റും ലഭിക്കും. ഒരു വർഷത്തിനിടെ 24 ബ്ലാക്ക് പോയിന്റ് ലഭിക്കുന്നവരുടെ ലൈസൻസ് സസ്പെൻഡ് ചെയ്യും. അനുമതിയില്ലാതെ വാഹനത്തിൽ ഭേദഗതി വരുത്തുന്നവർക്ക് 1,000 ദിർഹം പിഴ ചുമത്തും. ഒരു മാസത്തേക്കു വാഹനം കണ്ടുകെട്ടും. ഇതു വീണ്ടെടുക്കണമെങ്കിൽ പിഴയ്‌ക്കു പുറമേ 10,000 ദിർഹം കൂടി അടയ്‌ക്കണം. 3 മാസത്തിനകം തിരിച്ചെടുക്കാത്ത വാഹനങ്ങൾ ലേലം ചെയ്യുമെന്നും പൊലീസ് വ്യക്തമാക്കി. നിയമലംഘകരെ കുറിച്ചുള്ള വിവരം പൊതുജനങ്ങൾക്ക് 999 എന്ന നമ്പറിൽ അറിയിക്കാമെന്നും അധികൃതർ പറഞ്ഞു.