പാമ്പുകളുടെ കൂട്ടത്തിൽ വളരെ വ്യത്യസ്തമായ സ്വഭാവ സവിശേഷതകളുള്ള ഒരുപാട് പാമ്പുകൾ ഉണ്ട്. പാമ്പുകളിൽ ചിലത് കരയിൽ ജീവിക്കുന്നു ചിലത് വെള്ളത്തിൽ ജീവിക്കുന്നു. ചില പാമ്പുകൾ കരയിലും വെള്ളത്തിലും ജീവിക്കും. വെള്ളത്തിൽ ജീവിക്കുന്ന ഒരു സവിശേഷമായ പാമ്പിനെ പരിചയപ്പെടാം. ടെൻ്റക്കിൾഡ് അല്ലെങ്കിൽ ടെൻ്റക്കിൾ പാമ്പ്. എർപെറ്റൺ ടെൻ്റക്യുലാറ്റം എന്നതാണ് ഈ പാമ്പിന്റെ ശാസ്ത്രീയ നാമം. തെക്കുകിഴക്കൻ ഏഷ്യയിൽ കാണപ്പെടുന്ന പിൻ-കൊമ്പുള്ള ജലപാമ്പാണ് ടെൻ്റക്കിൾ. എർപെറ്റൺ ജനുസ്സിലെ ഒരേയൊരു ഇനമാണിത്. അതിന്റെ മൂക്കിലെ രണ്ട് ടെൻ്റക്കിളുകൾ മറ്റു പാമ്പുകളിൽ നിന്ന് ഇവയെ വ്യത്യസ്തമാക്കുന്നു.
ടെൻ്റക്കിൾ പാമ്പ് താരതമ്യേന ചെറിയ പാമ്പാണ്. ശരാശരി 50 മുതൽ 90 സെൻ്റീമീറ്റർ വരെ (20 മുതൽ 35 ഇഞ്ച് വരെ) നീളമുണ്ട്. കടും ചാരനിറമോ തവിട്ടുനിറമോ ആയിരിക്കും ഇവയ്ക്ക്. ഇത് ജീവിതകാലം മുഴുവൻ വെള്ളത്തിലാണ് ജീവിക്കുന്നത്. തലയുടെ മുൻഭാഗത്ത് ഇരട്ട “ടെന്റക്കിൾ” ഉള്ള ഒരേയൊരു പാമ്പാണ് ടെൻ്റക്കിൾ പാമ്പ്. അവയ്ക്ക് മെക്കാനിക്കൽ സെൻസറി പ്രവർത്തനമുണ്ടെന്ന് തെളിയിക്കപ്പെട്ടിട്ടുണ്ട്. മത്സ്യം മാത്രമാണ് ഇതിന്റെ ഭക്ഷണം. വിഷപ്പല്ലുകൾ ഉണ്ടെങ്കിലും, ഈ പാമ്പ് മനുഷ്യർക്ക് അപകടകാരിയല്ല. പല്ലുകൾ ചെറുതും ഭാഗികമായി മാത്രം ആഴമുള്ളതും വായയുടെ പിൻഭാഗത്ത് ആഴത്തിൽ സ്ഥിതി ചെയ്യുന്നതുമാണ്. മത്സ്യത്തെ വേട്ടയാടാൻ മാത്രമാണ് ഇവ വിഷപ്പല്ലുകൾ ഉപയോഗിക്കുന്നത്.
ഈ ജലപാമ്പുകൾക്ക് ശ്വാസകോശങ്ങളാണുള്ളത്, ചെകിളകൾ അല്ല. അതിനാൽ അവ ശ്വാസം എടുക്കാൻ വേണ്ടി വെള്ളത്തിന്റെ മുകളിലെത്തുന്നു. ശ്വാസം എടുക്കാനായി ടെന്റക്കിൾ പാമ്പ് മൂക്ക് വെള്ളത്തിന് പുറത്തേക്ക് ഉയർത്തും. 30 മിനിറ്റ് വരെ ഈ പാമ്പിന് ശ്വാസം പിടിച്ചുവെക്കാൻ സാധിക്കും.
