മലയാള സിനിമാ മേഖലയിലെ അഭിമാനതാരം ഫഹദ് ഫാസിലിനെ വാനോളം പുകഴത്തി നടൻ രജനികാന്ത്. ഫഹദ് ഫാസിലിനെ പൊലെയൊരു നാച്ചുറൽ ആർട്ടിസ്റ്റിനെ താൻ ഇതുവരെ കണ്ടിട്ടില്ലെന്നും അസാധ്യമായ അഭിനയമാണ് ഫഹദിന്റേതെന്നും രജനികാന്ത് പറഞ്ഞു. ചിത്രത്തിന്റെ ഓഡിയോ ലോഞ്ചിംഗിൽ സംസാരിക്കുകയായിരുന്നു രജനികാന്ത്.
“വേട്ടയനിലെ ഫഹദിന്റെ കഥാപാത്രത്തെ കുറിച്ച് സംവിധായകൻ എന്നോട് പറഞ്ഞിരുന്നു. എങ്ങനെയെങ്കിലും ഫഹദിനെ സിനിമയിലേക്ക് കൊണ്ടുവരണമെന്നും ഈ കഥയ്ക്ക് ഫഹദ് ആവശ്യമാണെന്നും അദ്ദേഹം എന്നോട് പറഞ്ഞു. അത് കേട്ടപ്പോൾ എനിക്ക് അത്ഭുതമാണ് തോന്നിയത്. കാരണം, ഫഹദിന്റെ സിനിമകളൊന്നും അങ്ങനെ ഞാൻ കണ്ടിട്ടില്ല. വിക്രമും മാമന്നനുമാണ് ആകെ കണ്ടിട്ടുള്ളത്. ഈ രണ്ട് സിനിമയിലും വളരെ സീരിയസ് കഥാപാത്രമായാണ് ഫഹദ് എത്തിയത്.
വേട്ടയനിൽ എന്റർടൈനർ കഥാപാത്രമാണ് ഫഹദിനുള്ളത്. ഇത് എങ്ങനെ ശരിയാകുമെന്ന് ഞാൻ ചിന്തിച്ചു. അപ്പോഴാണ് അവിടെയുണ്ടായിരുന്നവർ എന്നോട് പറഞ്ഞത്, സർ ഫഹദിന്റെ മലയാള സിനിമകൾ കാണണം അദ്ദേഹം ഒരു സൂപ്പർ ആർട്ടിസ്റ്റാണെന്ന്.
കേട്ടതൊക്കെ ശരിയാണെന്ന് സിനിമയുടെ ഷൂട്ടിംഗ് തുടങ്ങിയപ്പോൾ എനിക്ക് മനസിലായി. ഷോട്ടില്ലാത്ത സമയത്ത് ഫഹദിനെ കാണാൻ പോലും കിട്ടാറില്ല. കാരവാനിൽ ഇരിക്കുന്നത് കണ്ടിട്ട് പോലുമില്ല. ഷോട്ട് റെഡിയാകുമ്പോൾ എവിടെ നിന്നെങ്കിലും ഓടിയെത്തും. പെട്ടെന്ന് ഷോട്ട് തീർത്ത് പോകുകയും ചെയ്യും”. വളരെ മികച്ച നടനാണ് അദ്ദേഹമെന്നും രജനികാന്ത് പറഞ്ഞു.
