ടെൽഅവീവ്: പാലസ്തീൻ തീവ്രവാദ സംഘടനയായ ഇസ്ലാമിക് ജിഹാദിന്റെ ഉന്നത കമാൻഡർ മുഹമ്മദ് അബ്ദുള്ള നൂറിനെ വധിച്ചതായി ഇസ്രായേൽ പ്രതിരോധ സേന. വെസ്റ്റ് ബാങ്കിലെ തുൽക്കറെമിലുള്ള ഒരു ക്യാമ്പിൽ ഒളിവിൽ കഴിയുകയായിരുന്നു ഇയാൾ. ഇവിടെ നടത്തിയ വ്യോമാക്രമണത്തിലാണ് മുഹമ്മദ് അബ്ദുള്ളയെ വധിച്ചതെന്ന് സൈന്യം വ്യക്തമാക്കി. അബ്ദുള്ളയ്ക്ക് പുറമെ ഈ സംഘടനയിൽ പെട്ട മറ്റൊരു ഭീകരൻ കൂടി കൊല്ലപ്പെട്ടതായി ഐഡിഎഫ് പുറത്ത് വിട്ട പ്രസ്താവനയിൽ പറയുന്നു. അവദ് ഒമർ എന്ന ഭീകരനാണ് ഇതെന്നാണ് സൂചന. പ്രദേശത്ത് നിന്ന് എം-16 തോക്കുകൾ, വസ്ത്രങ്ങൾ തുടങ്ങിയവ കണ്ടെടുത്തിട്ടുണ്ട്.
ഓഗസ്റ്റ് അവസാനം നടത്തിയ ആക്രമണത്തിൽ ഇസ്ലാമിക് ജിഹാദിന്റെ മുൻ കമാൻ അബു ഷൂജ എന്ന മുഹമ്മദ് ജബ്ബർ കൊല്ലപ്പെട്ടിരുന്നു. ഇതിന് പിന്നാലെയാണ് മുഹമ്മദ് അബ്ദുള്ള കമാൻഡർ സ്ഥാനം ഏറ്റെടുക്കുന്നത്. ഹമാസിന്റെ സഖ്യകക്ഷിയാണ് പാലസ്തീൻ ഇസ്ലാമിക് ജിഹാദ്. വെസ്റ്റ് ബാങ്കിലും ഗാസയിലും ഇസ്രായേലിനെതിരായ പോരാട്ടത്തിന് പിന്തുണ ഭീകരസംഘടനയാണിത്. ഇസ്രായേലിനെതിരായ പോരാട്ടത്തിൽ പലയിടങ്ങളിലും സ്ഫോടക വസ്തുക്കൾ വിന്യസിക്കുന്ന ചുമതല ഉൾപ്പെടെ ഇയാൾ ഏറ്റെടുത്ത് നടത്തിയിരുന്നതായി ഇസ്രായേൽ സൈന്യം വ്യക്തമാക്കി.
അതേസമയം ലെബനനിൽ ഹിസ്ബുള്ള ഭീകരർക്കെതിരെയും ഇസ്രായേൽ ആക്രമണം കടുപ്പിച്ചിട്ടുണ്ട്. ഹിസ്ബുള്ളയുടെ ഇന്റലിജൻസ് ആസ്ഥാനവും, ആയുധ നിർമ്മാണ കേന്ദ്രങ്ങളും ലക്ഷ്യമിട്ട് കഴിഞ്ഞ ദിവസമാണ് ആക്രമണം നടത്തിയത്. റെസിഡൻഷ്യൽ ഏരിയകൾ, സ്കൂളുകൾ, സർവ്വകലാശാലകൾ തടുങ്ങിയവയുടെ അടിയിലായി പ്രത്യേക കേന്ദ്രങ്ങൾ നിർമ്മിച്ചാണ് ഭീകരർ ആയുധങ്ങൾ സംഭരിക്കുന്നതെന്നും, പ്രദേശത്തെ ജനങ്ങളുടെ ജീവൻ മുന്നിൽ വച്ചാണ് ഭീകരർ കളിക്കുന്നതെന്നും സൈന്യം ആരോപിച്ചു.
