അബുദബി: വാഹനം റോഡിന് നടുവിൽ ഗതാഗതം തടസപ്പെടുന്ന വിധം നിർത്തുന്നത് നിയമലംഘനമാണെന്ന മുന്നറിയിപ്പുമായി അബുദബി പൊലീസ്. 1,000 ദിർഹം പിഴയും ആറ് ട്രാഫിക് ബ്ലാക്ക് പോയിന്റുകളും ശിക്ഷ ലഭിക്കാവുന്ന ട്രാഫിക് കുറ്റകൃത്യമാണ് ഇതെന്ന് പൊലീസ് വ്യക്തമാക്കി.
അപ്രതീക്ഷിതമായുണ്ടായ അപകടങ്ങളെ തുടർന്ന് റോഡിൽ രണ്ടു വാഹനങ്ങൾ പെട്ടെന്ന് നിർത്തിയത് ഗുരുതര അപകടങ്ങൾ സൃഷ്ടിച്ച വീഡിയോ ദൃശ്യങ്ങൾ പങ്കുവെച്ചുകൊണ്ടായിരുന്നു പൊലീസിന്റെ മുന്നറിയിപ്പ്. ഓടിവന്ന വാഹനം മുൻപിലെ തടസം കാരണം റോഡിന് നടുവിൽ പെട്ടന്ന് നിർത്തുന്നതും പിന്നാലെ വന്ന വാഹനങ്ങൾ അതിൽ ഇടിച്ച് അപകടം ഉണ്ടാകുന്നതുമാണ് ദൃശ്യങ്ങളിലുളളത്.
വാഹനം തകരാറിലായാൽ, റോഡിൽ നിന്ന് മാറ്റി നിർത്തണം. അത്യാഹിത സാഹചര്യങ്ങൾക്കായി നിയുക്ത ബേകൾ ഉപയോഗിക്കുകയും ചെയ്യണമെന്ന് പൊലീസ് പറഞ്ഞു. ഒരു കാരണവശാലും വാഹനം റോഡിൽ നിർത്തരുതെന്നാണ് പൊലീസിന്റെ മുന്നറിയിപ്പ്.
അത്യാവശ്യ സന്ദർഭങ്ങളിൽ മാത്രം വലതു ഷോൾഡർ ഉപയോഗിക്കണമെന്ന് ട്രാഫിക് ആൻഡ് സുരക്ഷാ പട്രോളിംഗ് ഡയറക്ടറേറ്റ് മേധാവി ബ്രിഗേഡിയർ മഹ്മൂദ് യൂസഫ് അൽ ബലൂഷി പറഞ്ഞു.
