അമ്മയും അച്ഛനും നേരിട്ട പരിഹാസങ്ങൾക്ക് മറുപടിയാണ് തന്റെ സിനിമാ ജീവിതമെന്ന് നടി അഭിനയ. ജന്മനാ കേൾവിശേഷിയും സംസാരശേഷിയും ഇല്ലാത്ത താൻ ഒരുപാട് പ്രതിസന്ധികൾ നേരിട്ടുണ്ടെന്നും അതൊക്കെ തരണം ചെയ്ത് അമ്പതിലധികം ചിത്രങ്ങളിൽ അഭിനയിക്കാൻ സാധിച്ചുവെന്നും അഭിനയ പറഞ്ഞു. ജോജു ജോസഫ് സംവിധാനം ചെയ്ത പണി എന്ന ചിത്രത്തിന്റെ പ്രമോഷന്റെ ഭാഗമായി നടന്ന അഭിമുഖത്തിൽ പ്രതികരിക്കുകയായിരുന്നു താരം. പരിഭാഷകയുടെ സഹായത്തോടെ ആംഗ്യഭാഷയിലായിരുന്നു അഭിനയ പ്രതികരിച്ചത്.
“മിണ്ടാനും കേൾക്കാനും പറ്റാത്ത പെൺകുട്ടിയെ സിനിമ നടി ആക്കാൻ നടക്കുന്നു എന്ന് പറഞ്ഞ് എന്റെ അച്ഛനെയും അമ്മയെയും ഒരുപാട് പേർ പരിഹസിച്ചിട്ടുണ്ട്. അവർ നേരിട്ട പരിഹാസങ്ങൾക്കുള്ള മറുപടി ആയാണ് ഞാൻ ഇന്നിവിടെ നിൽക്കുന്നത്. എന്നെ കൊണ്ട് ഒന്നിനും കഴിയില്ലെന്ന് പറഞ്ഞവരോട് എനിക്ക് നന്ദി മാത്രമേ പറയാനുള്ളൂ.
ഒരുപാട് പേർ അച്ഛനെയും അമ്മയെയും കളിയാക്കിയിട്ടുണ്ട്. ഈ കുട്ടി എങ്ങനെ അഭിനയിക്കുമെന്ന് പലരും അവരോട് ചോദിച്ചു. ആദ്യമൊക്കെ സിനിമകൾ ചെയ്യുമ്പോൾ ഒരുപാട് കഷ്ടപ്പെട്ടിട്ടുണ്ട്. മറ്റ് ഭാഷകളിലൊക്കെ അമ്മയാണ് എനിക്ക് പറഞ്ഞുതരുന്നത്. മലയാളം അമ്മയ്‌ക്കും അറിയില്ലായിരുന്നു. ഒരുപാട് കഷ്ടപ്പെട്ട് ചെയ്ത സിനിമയാണ് പണി.
എല്ലാവരും സംസാരിക്കുമ്പോൾ ലിപ് സിങ്ക് വച്ചാണ് ഞാൻ മനസിലാക്കുന്നത്.
അച്ഛനും അമ്മയുമൊക്കെ ഒരുപാട് ബുദ്ധിമുട്ടിയിട്ടുണ്ട്. ഇതൊന്നും ഒരു പ്രശ്നമേ അല്ലെന്ന് അവർ എന്നോട് പറഞ്ഞു. പിന്നീട് എനിക്ക് ആത്മവിശ്വാസം ഉണ്ടാകാൻ തുടങ്ങി. പഠിക്കുന്ന സമയത്ത് സുഹൃത്തുക്കളാണ് എന്നെ സഹായിച്ചിരുന്നത്”.
ഞാനൊരു നടിയാകുമെന്ന് ഒരിക്കലും ചിന്തിച്ചിട്ടില്ല. ഒരുപാട് പേരുടെ അഭിനയം കണ്ടാണ് ഞാൻ അഭിനയത്തെ കുറിച്ച് കൂടുതൽ പഠിക്കുന്നതെന്നും അഭിനയ വ്യക്തമാക്കി.
