തിരുവനന്തപുരം: സ്വകാര്യ ലാബ് അധികൃതരുടെ പിഴവ് മൂലം ഇല്ലാത്ത തൈറോയ്ഡിന് മരുന്ന് കഴിച്ച് പാർശ്വഫലങ്ങൾ അനുഭവിക്കേണ്ടി വന്ന വീട്ടമ്മ നീതി തേടി നിയമവഴിയിൽ. ഹൃദയസംബന്ധമായ അസുഖത്തിന് ചികിത്സയിലിരിക്കുന്ന ലതാകുമാരിക്കാണ് സ്വകാര്യ ലാബ് അധികൃതരുടെ വീഴ്ച മൂലം ഇല്ലാത്ത രോഗത്തിന് മരുന്ന് കഴിക്കേണ്ടി വന്നത്.
തിരുവനന്തപുരം ഉള്ളൂരിലെ സ്വകാര്യ ലാബിനെതിരെയാണ് പരാതി. രക്തത്തിലെ ക്രിയാറ്റിൻ അളവ് പരിശോധിക്കാനായിട്ടാണ് ഉള്ളൂരിലെ സ്വകാര്യ ലബോറട്ടറിയിൽ ലതാകുമാരി രക്തം പരിശോധനയ്ക്ക് കൊടുത്തത്. ലഭിച്ചത് മൂന്നു പേജുകൾ ഉള്ള ഒരു പരിശോധനാ ഫലം. ഇത് നെടുമങ്ങാട് ഉള്ള പ്രൈമറി ഹെൽത്ത് സെൻറർ ഡോക്ടറെ കാണിച്ചു. പേര് ശ്രദ്ധിക്കാതെ റിപ്പോർട്ട് വായിച്ചു നോക്കിയ ഡോക്ടർ തൈറോയ്ഡിനുള്ള മരുന്ന് കുറിച്ചു നൽകി.
മരുന്ന് കഴിച്ചു കഴിഞ്ഞു ലതയ്ക്ക് ശരീരത്തിൽ നീരും രക്തസ്രാവവും ഉണ്ടായി. തുടർന്ന് വീണ്ടും ഡോക്ടറെ കണ്ടപ്പോഴാണ് പരിശോധനാ ഫലം മാറിയതായി ഡോക്ടറുടെയും ശ്രദ്ധയിൽപ്പെടുന്നത്. സ്വകാര്യ ലാബിൽ തൈറോഡ് പരിശോധനയ്ക്ക് എത്തിയ അനീഷ് എന്ന വ്യക്തിയുടെ ലാബ് റിപ്പോർട്ടാണ് ലതയ്ക്ക് നൽകിയത്.
ലതാകുമാരിക്ക് തൈറോയ്ഡ് ഇല്ല. എന്നാൽ അനീഷിന്റെ റിപ്പോർട്ട് കാണിച്ചതിനാൽ ഡോക്ടർ തൈറോയ്ഡിനുളള മരുന്ന് നൽകി. അതിന്റെ പാർശ്വഫലമായി ശരീരത്തിൽ മറ്റ് പ്രശ്നങ്ങൾ ഉണ്ടായി. നെടുമങ്ങാട് പിഎച്ച്എസ്ഇയിലെ ഡോക്ടർക്കും ചികിത്സയിൽ ഗുരുതര പിഴവാണ് സംഭവിച്ചതെന്ന് ലതാകുമാരി ആരോപിക്കുന്നു.
പിഴവ് മനസിലായ ശേഷം ലാബിൽ വിളിച്ചപ്പോൾ നേരിട്ട് വരാൻ പറഞ്ഞു. നേരിട്ടെത്തി റിപ്പോർട്ടുകൾ പരിശോധിച്ച ശേഷം റിസപ്ഷനിൽ ഇരുന്ന ജീവനക്കാരിയുടെ പിഴവാണെന്ന് പറഞ്ഞ് കൈയ്യൊഴിയുകയാണ് ചെയ്തത്. വേണമെങ്കിൽ ജീവനക്കാരിയുടെ പേരിൽ പരാതി നൽകാനും ലാബ് അധികൃതർ നിർദ്ദേശിച്ചുവെന്ന് ലതാകുമാരി പറയുന്നു.
സംഭവത്തിൽ മെഡിക്കൽ കോളേജിൽ പോലിസിലാണ് ലതാകുമാരി പരാതി നൽകിയത്. ഇനിയും ആർക്കും ഈ അവസ്ഥ വരരുതെന്നും സ്വകാര്യ ലാബുകൾ ഉത്തരവാദിത്വത്തോടെ പെരുമാറണമെന്നും പറഞ്ഞാണ് ലതാകുമാരി പരാതി നൽകിയിരിക്കുന്നത്.
