‘ എങ്കിലേ എന്നോട് പറ ‘ ഇത് കേൾക്കുമ്പോൾ തന്നെ മനസിലേക്ക് ഓടിയെത്തുക ലാലേട്ടന്റെ ചമ്മിയ മുഖവും , കള്ളച്ചിരിയുമാകും . ആ ചിത്രം ഏതാണെന്ന് പറയാൻ മലയാളിയ്‌ക്ക് അധികം സമയവും വേണ്ട . രസിപ്പിച്ചതിനൊപ്പം മലയാളി മനസിനെ നൊമ്പരപ്പെടുത്തിയ ചിത്രം കൂടിയായിരുന്നു വന്ദനം . ഒന്നിക്കാനാകാതെ പിരിഞ്ഞ ഉണ്ണികൃഷ്ണന്റെയും , ഗാഥയുടെയും പ്രണയം . മോഹൻലാലിനൊപ്പം മനസിൽ കയറിക്കൂടിയിരുന്നു വെളുത്ത് മെലിഞ്ഞ ആ സുന്ദരി നായികയും .
ഗിരിജ ഷെട്ടാർ ആയിരുന്നു അന്ന് മലയാളി മനസിനെ സങ്കടപ്പെടുത്തിയ നായിക .1969ൽ ബ്രിട്ടനിൽ ജനിച്ച ഗിരിജ നൃത്തത്തിലും പ്രാവീണ്യം നേടിയിരുന്നു . അത് കണ്ടാണ് മണിരത്നം തന്റെ ഗീതാഞ്ജലി എന്ന ചിത്രത്തിലേയ്‌ക്ക് ഗിരിജയെ ക്ഷണിച്ചത്.
1989ൽ പുറത്തിറങ്ങിയ ഈ സിനിമ സൂപ്പർഹിറ്റായതോടെ ഗിരിജയുടെ പേര് സിനിമാലോകത്ത് പ്രസിദ്ധമായി. അതിനുശേഷം രണ്ടോ മൂന്നോ സിനിമകൾ ചെയ്ത ഗിരിജ 2003ൽ യോഗ ഫിലോസഫിയിലും സ്പിരിച്വൽ സൈക്കോളജിയിലും ഡോക്ടറേറ്റ് തീസിസുകൾ പൂർത്തിയാക്കി. പിന്നീട് ഗിരിജയെ സിനിമയുടെ വെള്ളിവെളിച്ചത്തിൽ കണ്ടില്ല . വ്യക്തിപരമായ കാരണങ്ങളാൽ അവർക്ക് ലണ്ടനിലേക്ക് മടങ്ങേണ്ടി വന്നു.
പൂർണ്ണമായും ധ്യാനവും , യോഗയുമായി ബ്രിട്ടനിൽ കഴിയുകയാണ് അവർ . എന്നാൽ ഇപ്പോൾ 25 വർഷങ്ങൾക്ക് ശേഷം സിനിമയിലേയ്ക്ക് മടങ്ങി വരികയാണ് ഗിരിജ ഷെട്ടാർ. രക്ഷിത് ഷെട്ടിയുടെ സ്വന്തം നിർമ്മാണ കമ്പനിയായ പരമാവ സ്റ്റുഡിയോസ് നിർമ്മിച്ച കന്നഡ സിനിമയിലാണ് പ്രധാന വേഷത്തിൽ ഗിരിജ എത്തുന്നത്.
