കൊച്ചി: സ്പെഷ്യൽ സ്കൂൾ വിദ്യാർത്ഥികൾക്ക് ഭക്ഷ്യവിഷബാധ. കോഴിക്കോട് നിന്ന് കൊച്ചിയിൽ വിനോദയാത്രയ്‌ക്കെത്തിയ വിദ്യാർത്ഥികൾക്കാണ് ഭക്ഷ്യവിഷബാധയേറ്റത്. കട്ടിപ്പാറ കാരുണ്യതീരം സ്പെഷ്യൽ സ്കൂളിലെ വിദ്യാർത്ഥികളും ജീവനക്കാരും ഉൾപ്പടെയുള്ള 60-ഓളം പേർ കളമശേരി മെഡിക്കൽ കോളേജ് ആശുപത്രിയിൽ ചികിത്സയിലാണ്.
ഇന്ന് ഉച്ചയോടെയാണ് സംഭവം. മറൈൻ ഡ്രൈവിൽ യാത്ര ചെയ്ത ബോട്ടിൽ നിന്നാണ് 90 പേരടങ്ങുന്ന സംഘം ഉച്ചഭക്ഷണം കഴിച്ചത്. ചോറും കറികളുമാണ് കഴിച്ചത്. മധുരമുള്ള മോര് കറി കഴിച്ച കുട്ടികൾക്കാണ് ശാരീരിക അസ്വസ്ഥതകൾ പ്രകടമായതെന്ന് സ്കൂളിന്റെ ചെയർമാൻ പറഞ്ഞു. ആഹാരം കഴിച്ച ശേഷം ലുലുമാളിലേക്കാണ് സംഘം പുറപ്പെട്ടത്. ഇതിനിടയിൽ കുട്ടികൾക്കും രക്ഷിതാക്കൾക്കും വയറിളക്കവും ഛർദ്ദിയും അനുഭവപ്പെടുകയായിരുന്നു. 60-ഓളം പേർക്കാണ് ആരോഗ്യ പ്രശ്നങ്ങൾ റിപ്പോർ‌ട്ട് ചെയ്തിരിക്കുന്നത്.
