ഛത്രപതി ശിവാജി മഹാരാജിന്റെ പുത്രൻ ഛത്രപതി സംഭാജി മഹാരാജിന്റെ കഥ പറയുന്ന ഛാവ ഫെബ്രുവരി 14 ന് തിയേറ്ററുകളിലെത്തും. 2025 ലെ ഛത്രപതി ശിവാജി മഹാരാജ് ജയന്തിക്ക് മുന്നോടിയായി ആഗോളതലത്തിൽ റിലീസ് ചെയ്യാനാണ് തീരുമാനം.സംഭാജി മഹാരാജായി എത്തുന്നത് വിക്കി കൗശലാണ് . ഇതിനായി വലിയ തയ്യാറെടുപ്പാണ് വിക്കി നടത്തിയത്.
ദിനേശ് വിജന്റെ മഡോക്ക് ഫിലിംസിന്റെ ബാനറിലാണ് ചിത്രം നിർമിക്കുന്നത്. ഡിസംബർ ആറിനാണ് ചിത്രം തിയേറ്ററുകളിലെത്തുക എന്നാണ് നേരത്തെ അറിയിച്ചിരുന്നത് . എന്നാൽ പുഷ്പ 2 വിന്റെ റിലീസുമായി ക്ലാഷാകാതിരിക്കാൻ ഇപ്പോൾ തീയതി മാറ്റിയിരിക്കുകയാണ് ഛാവയുടെ നിർമ്മാതാക്കൾ.
മറാത്താ സാമ്രാജ്യത്തിന്റെ രണ്ടാമത്തെ ഭരണാധികാരി ഛത്രപതി ശിവാജിയുടെ മരണശേഷം പിൻഗാമിയായ സംഭാജി ഒമ്പത് വർഷക്കാലം ഭരിച്ചിരുന്നു. ഈ യോദ്ധാവിന്റെ കഥയാണ് പ്രേക്ഷകരുടെ മുന്നിലേക്ക് എത്തുന്നത്.രശ്മിക മന്ദാനയാണ് വിക്കിയുടെ നായികയായി ചിത്രത്തിലെത്തുന്നത്. ഛത്രപതി സംഭാജി മഹാരാജിന്റെ പത്‌നി യേശുഭായ് ഭോൻസാലെയുടെ വേഷമാണ് രശ്മിക അവതരിപ്പിക്കുന്നത്.
മറാത്താ സാമ്രാജ്യ സ്ഥാപകൻ ഛത്രപതി ശിവാജി മഹാരാജിന്റെ മകനായ പോരാളിയുടെ വേഷം ചെയ്യുന്നത് തനിക്ക് അഭിമാനമാണെന്ന് വിക്കി കൗശൽ അടുത്തിടെ പറഞ്ഞിരുന്നു. മറ്റെല്ലാ സൂപ്പർ ഹീറോകളും അവരുടെ മുന്നിൽ പരാജയപ്പെടും. അവരുടെ ധീരതയും ത്യാഗവും കൊണ്ടാണ് ഞങ്ങൾക്ക് ഈ മനോഹരമായ രാജ്യത്ത് ജീവിക്കാൻ കഴിയുന്നത്. ഛത്രപതി ശിവാജി മഹാരാജിനെയും ഛത്രപതി സാംഭാജി മഹാരാജിനെയും പോലുള്ള “യഥാർത്ഥ സൂപ്പർഹീറോകൾ” ഇല്ലാത്തതിനാലാണ് പാശ്ചാത്യ സിനിമാ നിർമ്മാതാക്കൾ അവഞ്ചേഴ്‌സ് പോലുള്ള സിനിമകൾ നിർമ്മിക്കുന്നത് എന്നും അദ്ദേഹം പറഞ്ഞിരുന്നു.
