ബെംഗളൂരു: കാറിന് മുകളിലേക്ക് കണ്ടെയ്നർ ലോറി മറിഞ്ഞ് ഒരു കുടുംബത്തിലെ ആറ് പേർക്ക് ദാരുണാന്ത്യം. നിലമംഗലയ്ക്ക് സമീപം ദേശീയപാത 48 ൽ ഇന്ന് രാവിലെയായിരുന്നു അപകടം. ചരക്കുകൾ കയറ്റി ബെംഗളൂരുവിൽ നിന്നും തുമകൂരുവിലേക്ക് പുറപ്പെട്ട കണ്ടെയ്നർ ലോറിയാണ് അപകടത്തിൽപ്പെട്ടത്.
വിജയപുരയിലേക്ക് അവധി ആഘോഷിക്കാൻ പോകുകയായിരുന്ന ചന്ദ്രയപ്പ യോഗലയും കുടുംബവുമായിരുന്നു വോൾവോ കാറിലുണ്ടായിരുന്നത്. ഇരുവാഹനങ്ങളും ഒരേ ദിശയിലായിരുന്നു സഞ്ചരിച്ചിരുന്നത്.
ഇതിനിടെ എതിർ ദിശയിൽ നിന്നുമെത്തിയ ലോറിയുമായി കണ്ടെയ്നർ ലോറി കൂട്ടിയിടിച്ച് നിയന്ത്രണം വിടുകയായിരുന്നു. ഇതോടെ ഇരു ലോറികളും മറിഞ്ഞുവീണു. കണ്ടെയ്നർ ലോറി വീണത് സമീപത്തെ ട്രാക്കിലൂടെ പോകുകയായിരുന്ന കാറിന്റെ മുകളിലേക്കായിരുന്നു.
Traffic advisory:
Slow-moving traffic in Bengaluru-Tumkur national highway due to vehicle accidents between canter and car near Beguru in Nelmangla.
Kindly co-operate. pic.twitter.com/0x6FmlOKyo— SP Bengaluru District Police (@bngdistpol) December 21, 2024
തുടർന്ന് ക്രെയ്ൻ ഉപയോഗിച്ച് കണ്ടെയ്നർ ലോറി ഉയർത്തിയ ശേഷം കാർ വെട്ടിപ്പൊളിച്ചാണ് യാത്രക്കാരെ പുറത്തെടുത്തത്. കാറിലുണ്ടായിരുന്നവർ സംഭവസ്ഥലത്ത് വച്ച് തന്നെ മരിച്ചു. മൃതദേഹങ്ങൾ ആശുപത്രിയിലേക്ക് മാറ്റിയതായി പൊലീസ് പറഞ്ഞു.
