ദുബായ്; പുതുവത്സരാഘോഷം പ്രമാണിച്ച് ദുബായ് റോഡ് ട്രാൻസ്പോർട്ട് അതോറിറ്റിയുടെ പൊതുഗതാഗത സേവനങ്ങളുടെ സമയക്രമത്തിൽ മാറ്റം. മെട്രോയും ട്രാമും തുടർച്ചയായി 2 ദിവസം സർവീസ് നടത്തും. വിവിധ എമിറേറ്റിൽനിന്ന് ദുബായിലേക്കു കൂടുതൽ ജനങ്ങൾ എത്താനുള്ള സാധ്യത കണക്കിലെടുത്ത് കൂടുതൽ പാർക്കിങ്ങും ഏർപ്പെടുത്തിയിട്ടുണ്ട്.
മെട്രോയും ട്രാമും 43 മണിക്കൂർ തുടർച്ചയായിട്ടാണ് സർവീസ് നടത്തുക. മെട്രോ ഡിസംബർ 31 രാവിലെ അഞ്ച് മണിമുതൽ ജനുവരി 1ന് അർധരാത്രി വരെ പ്രവർത്തിക്കും. ട്രാം 31-ന് രാവിലെ 6 മുതൽ ജനുവരി രണ്ട് പുലർച്ചെ രണ്ട് മണി വരെയും സേവനം നൽകും. 1400 ബസുകളിൽ സൗജന്യ യാത്രയ്‌ക്കും അവസരമൊരുക്കുന്നുണ്ടെന്ന് ആർടിഎ അറിയിച്ചു.
ഡൗൺടൗണിലെ ആഘോഷങ്ങളിൽ പങ്കെടുക്കാൻ എത്തുന്നവർക്കായി ദുബായ് മാൾ, സബീൽ, എമാർ ബൊളിവാർഡ് എന്നിവിടങ്ങളിൽ ഏകദേശം 20,000 അധിക പാർക്കിങ് സൗകര്യങ്ങൾ ഒരുക്കിയിട്ടുണ്ട്. അൽ വാസലിലും താമസ-കുടിയേറ്റ വകുപ്പിന്റെ പാർക്കിങ് സ്ഥലങ്ങളിലും വാഹന പാർക്കിങ്ങിനായി സൗകര്യമുണ്ടാകും. ഇവിടെനിന്ന് ആഘോഷസ്ഥലങ്ങളിലേക്ക് സൗജന്യ ഷട്ടിൽ ബസ് സർവീസുകളും ലഭ്യമാക്കും.
പുതുവർഷത്തലേന്ന് വൈകുന്നേരം നാലുമണി മുതൽ ഷെയ്ഖ് സായിദ് റോഡിന്റെ വിവിധഭാഗങ്ങൾ അടച്ചിടുമെന്ന് അധികൃതർ അറിയിച്ചു. ഡൗൺടൗൺ ദുബായിൽ പുതുവർഷം ആഘോഷിക്കാൻ ഒരുങ്ങുന്നവർ യാത്രകൾ നേരത്തേയാക്കണമെന്നും പരമാവധി പൊതുഗതാഗത സംവിധാനങ്ങൾ ഉപയോഗിക്കണമെന്നും അധികൃതർ അഭ്യർത്ഥിച്ചു.
