സിയോള്: ദക്ഷിണകൊറിയന് നടി കിം സെ റോണിനെ (24) വീട്ടിനുള്ളില് മരിച്ച നിലയില് കണ്ടെത്തി. ശനിയാഴ്ച പ്രാദേശിക സമയം അഞ്ചുമണിയോടെ കിം സെ റോണിനെ വീട്ടില് മരിച്ച നിലയില് കണ്ടെത്തിയ കാര്യം സുഹൃത്താണ് പൊലീസിനെ അറിയിച്ചത്. ദി മാന് ഫ്രം നോവേര്, എ ഗേള് അറ്റ് മൈ ഡോര് തുടങ്ങിയ സിനിമകളിലൂടെ ശ്രദ്ധ നേടിയ താരമാണ് കിം സെ റോണ്.
മരണത്തില് ദുരൂഹതയൊന്നുമില്ലെന്നാണ് പൊലീസിന്റെ പ്രാഥമിക നിഗമനം. വീട്ടില് ആരെങ്കിലും അതിക്രമിച്ചു കയറിയതിന്റെ ലക്ഷണങ്ങളോ സംശയകരമായ മറ്റെന്തെങ്കിലോ കണ്ടെത്തിയിട്ടില്ലന്നും മരണകാരണം അന്വേഷിച്ചുവരികയാണെന്നും പൊലീസ് അറിയിച്ചു.
2022 മെയ് മാസത്തില്, സിയോളില് മദ്യപിച്ച് വാഹനമോടിച്ച കേസിനെ തുടര്ന്ന് കിം സെ റോണ് പൊതുവേദികളില്നിന്ന് വിട്ടുനിന്നിരുന്നു. ഇവർ ഓടിച്ചിരുന്ന കാറ് ഇലക്ട്രിക്കല് ട്രാന്സ്ഫോര്മറില് ഇടിച്ചുകയറി നാശനഷ്ടങ്ങള് ഉണ്ടായി. സംഭവത്തില് അറസ്റ്റ് ചെയ്യപ്പെട്ട കിം പരസ്യമായി ക്ഷമാപണം നടത്തുകയും അഭിനയ ജീവിതത്തില് നിന്ന് പിന്മാറുകയും ചെയ്തു.
2009-ല് പുറത്തിറങ്ങിയ എ ബ്രാന്ഡ് ന്യൂ ലൈഫ് എന്ന ചിത്രത്തിലൂടെ തന്റെ ഒമ്പതാം വയസ്സില് ബാലതാരമായാണ് കിം സെ റോണ് അഭിനയരംഗത്തേക്ക് എത്തുന്നത്. സിനിമകള്ക്ക് പുറമെ വിവിധ ടെലിവിഷന് പരമ്പരകളിലും താരം പ്രധാനവേഷങ്ങള് ചെയ്തിട്ടുണ്ട്. 2023-ല് പുറത്തിറങ്ങിയ ബ്ലഡ്ഹൂണ്ട്സ് ആണ് അവസാന സീരീസ്.
