15999 രൂപയ്ക്ക് പുതു ടാബ് ലെറ്റ് പുറത്തിറക്കി പ്രമുഖ ടെക് കമ്പനിയായ എച്ച്എംഡി. ഈടും മികച്ച പ്രകടനവും ആഗ്രഹിക്കുന്ന ഉപഭോക്താക്കള്ക്കായി രൂപകല്പന ചെയ്തതാണ് ടി21 ടാബ് ലെറ്റെന്ന് എച്ച്എംഡി അവകാശപ്പെടുന്നു. 15,999 രൂപ വിലയുള്ള എച്ച്എംഡി ടി21 ടാബ്ലെറ്റ് ഇപ്പോള് 14,499 എന്ന പ്രത്യേക ഓഫര് വിലയില് പരിമിത കാലത്തേക്ക് മാത്രമായി കമ്പനിയുടെ വെബ്സൈറ്റില് ലഭ്യമാകും.
നിരവധി ഫീച്ചറുകളോടെയാണ് ടി21 ടാബ്ലെറ്റ് എത്തിയിരിക്കുന്നത്. 10.36 ഇഞ്ച് ടുകെ ഡിസ്പ്ലേയില് നെറ്റ്ഫ്ലിക്സിന്റെ എച്ച്ഡി വിഡിയോകളും കുട്ടികളില് ജിജ്ഞാസയും സര്ഗാത്മകതയും വളര്ത്തുന്നതിനായി തയ്യാറാക്കിയ പ്രത്യേക ഉള്ളടക്കങ്ങളു കാണാം. മുന്നിലും പിന്നിലുമായി ഓട്ടോഫോക്കസും എല്ഇഡി ഫ്ളാഷുമുള്ള 8 മെഗാപിക്സല് ക്യാമറയാണുള്ളത്.
ഒക്ടാ-കോര് യൂണിസോക് ടി612 പ്രോസസറാണ് ടി21ന്റെ കരുത്ത്. 8 ജിബി റാം, 128 ജിബി ഇന്റേണല് സ്റ്റോറേജ് (512 ജിബി വരെ ഉയര്ത്താം), 18വാട്ട് ഫാസ്റ്റ് ചാര്ജറോടുകൂടിയ 8200 എംഎഎച്ച് ഓള്ഡേ ബാറ്ററി എന്നിവയാണ് മറ്റ് സവിശേഷതകള്. ആന്ഡ്രോയിഡ് 13ലാണ് പ്രവര്ത്തനം, ആന്ഡ്രോയിഡ് 14 അപ്ഗ്രേഡ് ലഭ്യമാണ്. 4ജി വോയിസ് കോളിങ്, എസ്എംഎസ്, ഡ്യുവല് സിം, വേഗതയേറിയ വൈ-ഫൈ കണക്റ്റിവിറ്റി എന്നിവയെയും ടി21 ടാബ്ലെറ്റിന്റെ പ്രത്യേകതകളാണ്.