അബുദാബി: മലയാളി വനിതാ ഡോക്ടറെ അബുദാബിയിൽ മരിച്ചനിലയിൽ കണ്ടെത്തി.കണ്ണൂർ തളാപ്പ് സ്വദേശിനിയായ ഡോ.അരയക്കണ്ടി ധനലക്ഷ്മിയെ (54) ആണ് മരിച്ചത്. തിങ്കളാഴ്ച രാത്രിയാണ് മുസഫയിലെ ഫ്ലാറ്റിൽ മൃതദേഹം കണ്ടെത്തിയത്. രണ്ട് ദിവസമായി ഫോണിൽ ബന്ധപ്പെടാൻ സാധിക്കാത്തതിനെ തുടർന്ന് സുഹൃത്തുക്കൾ ഫ്ലാറ്റിൽ എത്തിയപ്പോഴാണ് വിവരമറിയുന്നത്.
അബുദാബി ലൈഫ് കെയർ ആശുപത്രിയിലെ ഡെന്റിസ്റ്റായിരുന്നു.
10 വർഷമായി പ്രവാസിയാണ്. അബുദാബി മലയാളി സമാജം അംഗമായ ധനലക്ഷ്മി കലാ- സാംസ്‌കാരിക രംഗത്തും സജീവമാണ്. സാമൂഹിക മാധ്യമങ്ങളിലും സജീവമായിരുന്നു. മുൻപ് കണ്ണൂർ ധനലക്ഷ്മി ആശുപത്രിയിലും ജോലി ചെയ്തിരുന്നു. മൃതദേഹം ബനിയാസ് മോർച്ചറിയിലേക്ക് മാറ്റി.
ആനന്ദകൃഷ്ണ ബസ് സർവീസ് ഉടമ പരേതനായ നാരായണനും ചന്ദ്രമതിയുമാണ് മാതാപിതാക്കൾ. ഭർത്താവ് സുജിത്ത് നാട്ടിലാണ്. ആനന്ദകൃഷ്ണൻ, ശിവറാം, ഡോ.സീതാലക്ഷ്മി എന്നിവർ സഹോദരങ്ങളാണ്. മൃതദഹം നാട്ടിൽ കൊണ്ടുവന്ന് സംസ്കരിക്കും.
