ചെറിയൊരു ഇടവേളയ്ക്ക് ശേഷം ചികിത്സ പൂർത്തിയാക്കി സിനിമാലോകത്ത് വീണ്ടും സജീവമായി മമ്മൂട്ടി. മോഹൻലാലിനൊപ്പമുള്ള മഹേഷ് നാരായണൻ ചിത്രത്തിൽ മമ്മൂട്ടി ജോയിൻ ചെയ്തു. മമ്മൂട്ടിയോടൊപ്പമുള്ള ചിത്രം പങ്കുവച്ച് കൊണ്ട് നിർമാതാവ് ആന്റോ ജോസഫാണ് ഇക്കാര്യം ആരാധകരുമായി പങ്കുവച്ചത്. ഒക്ടോബർ ഒന്നിന് ചിത്രീകരണം പുനരാരംഭിക്കും. ഷൂട്ടിംഗ് നടക്കുന് ഹൈദരാബാദിലാണ് അദ്ദേഹം എത്തുക.
മമ്മൂട്ടി, മോഹൻലാൽ, കുഞ്ചാക്കോ ബോബൻ എന്നിവരോടൊപ്പം നിൽക്കുന്ന ചിത്രമാണ് ആന്റോ ജോസഫ് പങ്കുവച്ചത്. “പ്രിയപ്പെട്ട മമ്മൂക്ക വരുന്നു. ചെറിയൊരു ഇടവേളയായിരുന്നു ഇത്രയും കാലം എന്നുമാത്രമേ കരുതുന്നുള്ളൂ. അപ്രതീക്ഷിതമായി വന്ന ആ ഇടവേള ലോകമെങ്ങുമുള്ളവരുടെ പ്രാർത്ഥനകളുടെയും മനസാന്നിധ്യത്തിന്റെയും ബലത്തിൽ അതിജീവിച്ചു. മമ്മൂക്ക ഹൈദരാബാദ് ഷെഡ്യൂളിൽ ജോയിൻ ചെയ്യും.
പ്രാർത്ഥനകളിൽ കൂട്ടുനിന്നവർക്കും, ഉലഞ്ഞപ്പോൾ തുണയായവർക്കും ഹൃദയം നിറഞ്ഞ നന്ദിയും സ്നേഹവും”- ആന്റോ ജോസഫ് ഫെയ്സ്ബുക്കിൽ കുറിച്ചു.
ബിഗ് ബജറ്റിൽ ഒരുങ്ങുന്ന മൾട്ടി സ്റ്റാർ ചിത്രമാണിത്. ചില ആരോഗ്യ പ്രശ്നങ്ങളെ തുടർന്ന് ചെറിയ ഇടവേള എടുത്തതിന് ശേഷമാണ് മമ്മൂട്ടി തിരികെ സിനിമയിലേക്ക് വരുന്നത്. സിനിമയിൽ നിന്ന് മാറി ചെന്നൈയിൽ ചികിത്സയിലായിരുന്നു താരം. പിന്നീട് പൂർണ ആരോഗ്യവാനാണെന്ന് ഡോക്ടർമാർ സ്ഥിരീകരിച്ചു. തിരികെയുള്ള മമ്മൂട്ടിയുടെ വരവ് പ്രതീക്ഷിച്ചിരിക്കുകയായിരുന്നു മലയാള സിനിമാലോകം.
