ഹൈദരാബാദ്: ആന്ധ്രാപ്രദേശിലെ കുർണൂലിലുണ്ടായ ബസ് തീപിടിത്തത്തിൽ തീയുടെ തീവ്രതക്ക് കാരണമായത് ബസിലുണ്ടായിരുന്ന 234 സ്മാർട്ട്ഫോണുകൾ എന്ന് നിരീക്ഷണം. അപകടസമയത്ത് ബസിനുള്ളിൽ 234 സ്മാർട്ട്ഫോണുകൾ ഉണ്ടായിരുന്നു എന്നതാണ് പുറത്തുവരുന്ന വിവരം. ഈ ഫോണുകളുടെ ബാറ്ററികൾ പൊട്ടിത്തെറിച്ചതിനാൽ തീയുടെ തീവ്രത കൂടാൻ കാരണമായെന്ന് ഫോറൻസിക് വിദഗ്ധർ ചൂണ്ടികാണിക്കുന്നു.
ഹൈദരാബാദ് ആസ്ഥാനമായുള്ള മംഗനാഥ് എന്ന വ്യവസായി 46 ലക്ഷം രൂപ വിലയുള്ള 234 സ്മാർട്ട്ഫോണുകൾക്ക് ബെംഗളൂരുവിലെ ഇ-കൊമേഴ്സ് കമ്പനിയിലേക്ക് പാഴ്സലായി അയച്ചിരുന്നു . ബസിൽ തീപിടിക്കുന്നതിനിടയിൽ ബാറ്ററികൾ പൊട്ടിത്തെറിക്കുന്ന ശബ്ദം കേട്ടതായി ദൃക്സാക്ഷികൾ പറയുന്നതായി എൻഡിടിവി റിപ്പോർട്ട് ചെയ്യുന്നു.
സ്മാർട്ട്ഫോണുകൾ പൊട്ടിത്തെറിച്ചതിന് പുറമേ ബസിന്റെ എയർ കണ്ടീഷനിംഗ് സിസ്റ്റത്തിനായി ഉപയോഗിക്കുന്ന ഇലക്ട്രിക്കൽ ബാറ്ററികളും പൊട്ടിത്തെറിച്ചതായി വിദഗ്ധർ സൂചിപ്പിക്കുന്നു.
