വിവാഹ ഒരുക്കങ്ങൾ പോലെ എല്ലാവരും പ്രത്യേകം ശ്രദ്ധിക്കുന്ന ഒന്നാണ് ഹണിമൂൺ ഡെസ്റ്റിനേഷൻ. വിവാഹത്തെ കുറിച്ച് ആഗ്രഹങ്ങളും സ്വപ്നങ്ങളും ഉള്ളതുപോലെ മധുവിധു ആഘോഷിക്കാൻ എവിടെ പോകാമെന്നും വധൂവരന്മാർ ആലോചിക്കാറുണ്ട്. പൊതുവേ കേരളത്തിന് പുറത്താണ് അധികം ആളുകളും പോകുന്നത്. എന്നാൽ കേരളത്തിലുമുണ്ട് മധുവിധു സുന്ദരമാക്കാനുള്ള ചില മനോഹരമായ സ്ഥലങ്ങൾ. അവ ഏതൊക്കെയെന്ന് നോക്കാം.
വയനാട്ടിലെ ചെമ്പ്ര കൊടുമുടി – അധികമാരും പോകാത്ത സ്ഥലമാണ് ചെമ്പ്ര കൊടുമുടി. കേരളത്തിലെ ഏറ്റവും മികച്ച ഹണിമൂൺ സ്ഥലങ്ങളിലൊന്നായാണ് ചെമ്പ്ര കൊടുമുടി അറിയപ്പെടുന്നത്. കടൽനിരപ്പിൽ നിന്ന് 2,100 മീറ്റർ ഉയരമുള്ള ഈ കൊടുമുടി മേപ്പാടി ഗ്രാമത്തിന് സമീപത്തായാണ് സ്ഥിതിചെയ്യുന്നത്. അപൂർവയിനം സസ്യങ്ങളുടെയും വന്യജീവികളുടെയും വിഹാരകേന്ദ്രമാണിവിടം.
വാഗമൺ – പുൽമേടുകളും തണുത്ത പർവതങ്ങളും ആസ്വദിക്കാൻ ഇഷ്ടമുള്ളവർക്ക് ബെസ്റ്റ് ഓപ്ഷനാണ് വാഗമൺ. ചെറിയ കുളങ്ങളും പുഴകളുമൊക്കെ വാഗമണിന്റെ പ്രത്യേകതയാണ്. ബഹളങ്ങൾ ഒഴിവാക്കുന്ന തരത്തിൽ ശാന്തമായ ഇടമാണിവിടം. അതുകൊണ്ട് തന്നെ സുഹൃത്തുക്കളോടൊപ്പവും കുടുംബത്തോടൊപ്പവും അവധി ആഘോഷിക്കാൻ വരുന്നവരും ഒരുപാടുണ്ട്.
കുമരകം- ലേക് സിറ്റിയെന്ന് അറിയപ്പെടുന്ന കേരളത്തിലെ ഏറ്റവും വലിയ ശുദ്ധജല തടാകമാണ് കുമരകം. ഹണിമൂൺ യാത്രയ്ക്ക് ഏറ്റവും ഉത്തമസ്ഥലമാണ് ഇവിടം. ബോട്ടിംഗ്, മിൻപിടിത്തം എന്നിവ ഇഷ്ടപ്പെടുന്നവർക്കും കുമരകം മികച്ച ഓപ്ഷനാണ്.
ലക്കം വെള്ളച്ചാട്ടം – ഇരവികുളം ദേശീയോദ്യാനത്തിന്റെ ഭാഗമാണ് ലക്കം വെള്ളച്ചാട്ടം. തേയിലത്തോട്ടവും പച്ചപ്പ് നിറഞ്ഞ കുന്നുകളും തിങ്ങിയുള്ള അതിമനോഹരമായ വെള്ളച്ചാട്ടമാണിത്.
മറയൂർ- ആയുർവേദത്തിന്റെ നാടെന്ന ഖ്യാദിയിൽ അറിയപ്പെടുന്ന ഹണിമൂൺ ഡെസ്റ്റിനേഷനാണ് മറയൂർ. അവധി ആഘോഷങ്ങൾക്കായി ഏറ്റവുമധികം ആളുകൾ എത്തുന്ന സ്ഥലമാണിത്. വൈവിധ്യം നിറഞ്ഞ കാഴ്ചകൾ കൊണ്ട് സമ്പന്നമാണ് മറയൂർ. ചന്ദനക്കാടുകൾ കാണാൻ എത്തുന്ന സഞ്ചാരികൾക്ക് കാട്ടുപോത്തും മാനും മ്ലാവും വേറിട്ട അനുഭവമാണ് നൽകുന്നത്.
