ചെന്നൈ: ചെന്നൈയിൽ സീരിയൽ നടിയെ മരിച്ചനിലയിൽ കണ്ടെത്തി. ഭാഗ്യലക്ഷ്മി, സിറഗടിക്ക ആസൈ തുടങ്ങി വിവിധ തമിഴ് ടെലിവിഷൻ സീരിയലുകളിലെ വേഷങ്ങളിലൂടെ അറിയപ്പെട്ട രാജേശ്വരിയേയാണ് മരിച്ചനിലയിൽ കണ്ടെത്തിയത്. ആത്മഹത്യയെന്ന് സംശയിക്കുന്നു. നടി രാജേശ്വരിയുടെ (39) മരണത്തിൽ സൈദാപ്പേട്ട പോലീസ് അന്വേഷണം ആരംഭിച്ചു.
പ്രാഥമിക അന്വേഷണത്തിൽ, ഭർത്താവുമായി നടിക്ക് ദാമ്പത്യ പ്രശ്നങ്ങൾ ഉണ്ടായിരുന്നുവെന്നും അടുത്തിടെയുണ്ടായ ഒരു തർക്കത്തെത്തുടർന്ന് അവർ സൈദാപ്പേട്ടിലുള്ള അമ്മയുടെ വീട്ടിലേക്ക് താമസം മാറിയിരുന്നുവെന്നും കണ്ടെത്തിയാതായി തമിഴ് മാധ്യമങ്ങൾ റിപ്പോർട്ട് ചെയ്യുന്നു .
ഈ വേർപിരിയൽ മൂലം രാജേശ്വരി കടുത്ത മാനസിക സമ്മർദ്ദം അനുഭവിച്ചിരുന്നതായി റിപ്പോർട്ടുണ്ട്. വ്യാഴാഴ്ച, സൈദാപേട്ടിലെ വസതിയിൽ തനിച്ചായിരിക്കെയാണ് അവർ ആത്മഹത്യ ചെയ്തതെന്നു സംശയിക്കുന്നു.
അബോധാവസ്ഥയിൽ കണ്ടെത്തിയ അവരെ മാതാപിതാക്കൾ ആദ്യം പ്രദേശത്തെ ഒരു സ്വകാര്യ ആശുപത്രിയിൽ പ്രവേശിപ്പിച്ചു. നില ഗുരുതരമായതിനാൽ പിന്നീട് വിദഗ്ധ ചികിത്സയ്ക്കായി കിൽപോക്കിലെ സർക്കാർ ആശുപത്രിയിലേക്ക് മാറ്റി.
തീവ്രപരിചരണ വിഭാഗത്തിൽ ചികിത്സ നൽകിയ രാജേശ്വരി വെള്ളിയാഴ്ച മരണത്തിന് കീഴടങ്ങി.
