കോഴിക്കോട്: സ്ത്രീകളും പുരുഷൻമാരും ഒരുമിച്ച് നൃത്തംചെയ്യുന്നത് അംഗീകരിക്കാൻ കഴിയില്ലെന്ന് സമസ്തയുടെ യുവജന വിഭാഗമായ എസ്വൈഎസിന്റെ പ്രമേയം. സ്ത്രി പുരുഷൻമാർ പരസ്പരം ബോധപൂർവ്വമുള്ള ദർശനം പോലും വിലക്കിയ മതമാണ് ഇസ്ലാം എന്നും ഇക്കാര്യം ഓർമവേണമെന്നുമാണ് പ്രമേയത്തിൽ പറയുന്നത്. ഇന്നലെ കോഴിക്കോട് ചേർന്ന എസ്വൈഎസ് സംസ്ഥാന പ്രവർത്തക സമിതിയിലാണ് ഇത് സംബന്ധിച്ച പ്രമേയം പാസാക്കിയത്. സംഘടനയുടെ ഈ പിന്തിരിപ്പൻ നയത്തിനെ അതിരൂക്ഷ വിമർശനമാണ് വിവിധ ഇടങ്ങളിൽ നിന്ന് ഉയരുന്നത്
തെരഞ്ഞെടുപ്പിന്റെ പശ്ചാത്തലത്തിൽ ഇസ്ലാമിക നിയമങ്ങൾ കാറ്റിൽപറത്തിക്കൊണ്ട് റോഡിൽ പോലും മുസ്ലീം സ്ത്രീകളും പുരുഷനും ഇടകലരുന്നുണ്ടായിരുന്നു. ഇക്കാര്യം സമസ്തയ്ക്കും എസ്വൈഎസിനും അംഗീകരിക്കാൻ കഴിയില്ല. കഴിഞ്ഞ ഏതാനും വർഷങ്ങൾക്കിടയിൽ സ്ത്രീപുരുഷൻമാർക്കിടയിൽ ഇസ്ലാം നിശ്ചയിച്ച അതിർവരമ്പുകൾ വല്ലാതെ നേർത്തുവരുന്നു.
വിജയാഹ്ലാദത്തിന്റെ പേരിൽ രാത്രികളിൽ നടുറോട്ടിൽ സ്ത്രീകളും പുരുഷൻമാരും ഒരുമിച്ച് നൃത്തംചെയ്യുന്നത് ഒരിക്കലും ന്യായീകരിക്കാൻ കഴിയില്ല. ഈയടുത്ത കാലത്താണ് പരപുരുഷൻമാരോടൊപ്പം മുസ്ലിം സ്ത്രീകൾ പ്രകടനങ്ങളിൽ പങ്കെടുക്കുന്നത്.
സ്ത്രീകളോടൊപ്പം ചേർന്നിരിക്കുന്നതും ഒപ്പം നിർത്തി ഫോട്ടോയ്ക്ക് പോസ് ചെയ്യുന്നതും പൊതുവേദിയിൽ അന്യപുരുഷൻമാരെ അഭിസംബോധന ചെയ്ത് മുസ്ലിം സ്ത്രീകൾ പ്രസംഗിക്കുന്ന രീതിയും പുതിയ പ്രവണതകളാണെന്നതും പ്രമേയത്തിൽ പറയുന്നു.
