കോഴിക്കോട്: രാജ്യസഭാ എംപിയും ഇന്ത്യന് ഒളിംപിക്സ് അസോസിയേഷന് പ്രസിഡന്റുമായ പി.ടി ഉഷയുടെ ഭർത്താവ് വെങ്ങാലിൽ ശ്രീനിവാസൻ (64) അന്തരിച്ചു. കോഴിക്കോട് പെരുമാൾപുരത്തെ വീട്ടിൽ വെച്ച് രാത്രി 12.30 ഓടെ കുഴഞ്ഞു വീഴുകയായിരുന്നു.
ഉടന് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. പാർലമെൻറ് സമ്മേളനത്തിൽ പങ്കെടുക്കാൻ ഡൽഹിയിലായിരുന്നു പി. ടി. ഉഷ. സംഭവത്തിന് പിന്നാലെ പി.ടി ഉഷ നാട്ടിലേക്ക് തിരിച്ചു. സംസ്കാരം വൈകീട്ട് 4 മണി പയ്യോളിയിലെ വീട്ടുവളപ്പിൽ നടക്കും.
1991-ലാണ് ശ്രീനിവാസനും പി. ടി ഉഷയും വിവാഹിതരായത്. പൊന്നാനി സ്വദേശിയായ അദ്ദേഹം മുന് ദേശീയ കബഡി താരം കൂടിയാണ്. കേന്ദ്ര വ്യവസായ സുരക്ഷാ സേനയിൽ ഡിവൈഎസ്പിയായാണ് വിരമിച്ചത്. സ്പോർട്സ് മെഡിസിൻ വിദഗ്ധനായ ഡോ. വിഘ്നേഷ് ഉജ്ജ്വൽ ഏക മകനാണ്. കൃഷ്ണ മരുമകളാണ്.
