തിരുവനന്തപുരം: കൊല്ലത്ത് കേന്ദ്ര ആഭ്യന്തരമന്ത്രി അമിത് ഷായ്ക്കുനേരെ യൂത്ത് കോൺഗ്രസ് പ്രവർത്തകർ നടത്തിയ കരിങ്കൊടി പ്രതിഷേധം കോൺഗ്രസിനുള്ളിൽ തന്നെ വിവാദമാകുന്നു. യൂത്ത് കോൺഗ്രസിലെ കെ സി വേണുഗോപാൽ ഗ്രൂപ്പാണ് പ്രതിഷേധത്തിന് പിന്നിലെന്നാണ് ഒരു വിഭാഗം കോൺഗ്രസ് നേതാക്കളുടെ ആരോപണം. വി ഡി സതീശനെ രാഷ്ട്രീയമായി ബുദ്ധിമുട്ടിലാക്കുക എന്ന ലക്ഷ്യത്തോടെയാണ് നീക്കം നടത്തിയതെന്നും ഇവർ ആരോപിക്കുന്നു.
കേന്ദ്ര ആഭ്യന്തര മന്ത്രിയ്ക്കുനേരെയുണ്ടായ പ്രതിഷേധ ത്തിൽ മുഖ്യമന്ത്രി വി ഡി സതീശനും ആഭ്യന്തരമന്ത്രി രമേശ് ചെന്നിത്തലയ്ക്കും അതൃപ്തിയുണ്ടെന്നാണ് വിവരം. സംസ്ഥാനത്ത് അനാവശ്യ സംഘർഷങ്ങൾക്ക് വഴിയൊരുക്കുന്ന നടപടിയായി സംഭവത്തെ ഒരു വിഭാഗം നേതാക്കൾ വിലയിരുത്തുന്നു.
കെ സി വേണുഗോപാൽ പക്ഷത്തെ നേതാക്കൾ പാർട്ടിക്കുള്ളിൽ മതിയായ കൂടിയാലോചന നടത്താതെയാണ് കൊല്ലത്ത് പ്രതിഷേധം സംഘടിപ്പിച്ചതെന്നാണ് വിമർശനം. പ്രതിഷേധത്തിന് നേതൃത്വം നൽകിയ യൂത്ത് കോൺഗ്രസ് നേതാക്കളുടെ നടപടിയെ അപക്വമെന്നും ഒരു വിഭാഗം കോൺഗ്രസ് നേതാക്കൾ വിശേഷിപ്പിക്കുന്നു.
‘സതീശനെ ബുദ്ധിമുട്ടിലാക്കുക ലക്ഷ്യം’
കെ സി വേണുഗോപാൽ പക്ഷവുമായി അടുപ്പമുള്ള നേതാക്കളുടെ നേതൃത്വത്തിലാണ് അമിത് ഷായ്ക്കെതിരായ പ്രതിഷേധം നടന്നതെന്നാണ് കോൺഗ്രസിലെ ഒരു വിഭാഗത്തിന്റെ ആരോപണം. കെ സി വേണുഗോപാൽ പക്ഷത്തിന്റെ ‘മെഗാഫോൺ’ പോലെ പ്രവർത്തിക്കുന്ന ഒരാളുടെ നേതൃത്വത്തിലാണ് പ്രതിഷേധം നടന്നതെന്നും ഇവർ കുറ്റപ്പെടുത്തുന്നു.
പ്രതിഷേധത്തിന് പിന്നിൽ മതിയായ രാഷ്ട്രീയ കൂടിയാലോചന ഉണ്ടായില്ലെന്നും ഇതുവഴി പ്രതിപക്ഷത്തിന്റെ രാഷ്ട്രീയ നിലപാടുകൾക്ക് തന്നെ തിരിച്ചടിയുണ്ടാകുന്ന സാഹചര്യമുണ്ടായെന്നും വിമർശനം ഉയരുന്നു.
അതേസമയം, അമിത് ഷായ്ക്കുനേരെ യൂത്ത് കോൺഗ്രസ് നടത്തിയ കരിങ്കൊടി പ്രതിഷേധത്തിന് പിന്നാലെ സംസ്ഥാനത്ത് കോൺഗ്രസ് നേതാക്കൾക്കും മന്ത്രിമാർക്കും നേരെ യുവമോർച്ചയുടെ കരിങ്കൊടി പ്രതിഷേധം ശക്തമായിട്ടുണ്ട്.
യൂത്ത് കോൺഗ്രസിന്റെ പ്രതിഷേധം ഇതോടെ സംസ്ഥാനത്ത് ബിജെപിക്ക് കൂടുതൽ രാഷ്ട്രീയ പ്രതിഷേധത്തിനുള്ള സാഹചര്യമൊരുക്കിയെന്ന ആശങ്കയാണ് വി ഡി സതീശൻ പക്ഷത്തെ ഒരു വിഭാഗം നേതാക്കൾക്കുള്ളത്. സിപിഎമ്മിനെ തികച്ചും അപ്രസക്തമാക്കി കൊണ്ട് ഊർജസ്വലമായി പ്രതിപക്ഷത്തിന്റെ രാഷ്ട്രീയ റോൾ നിർവഹിക്കുന്ന ബിജെപിയുടെ പ്രതിഷേധങ്ങൾക്ക് കൂടുതൽ രാഷ്ട്രീയ മൂർച്ച ലഭിക്കാൻ യൂത്ത് കോൺഗ്രസ് നീക്കം കാരണമായെന്നാണ് ഇവരുടെ വിലയിരുത്തൽ.
കൊല്ലത്തെ പ്രതിഷേധം പാർട്ടിക്കുള്ളിൽ ആവശ്യമായ കൂടിയാലോചനകൾക്ക് ശേഷമായിരുന്നില്ലെന്നും ഒരു വിഭാഗം കോൺഗ്രസ് നേതാക്കൾ ആവർത്തിച്ചു. സംഭവത്തിന് പിന്നാലെ സംസ്ഥാനത്ത് കോൺഗ്രസ് നേതാക്കൾക്കും മന്ത്രിമാർക്കുമെതിരെ യുവമോർച്ച പ്രതിഷേധം തുടരുന്ന സാഹചര്യത്തിൽ, യൂത്ത് കോൺഗ്രസിന്റെ പ്രതിഷേധം കോൺഗ്രസിനുള്ളിൽ തന്നെ പുതിയ രാഷ്ട്രീയ ചർച്ചകൾക്ക് വഴിവെച്ചിരിക്കുകയാണ്.
