മുംബൈ: സ്വതന്ത്ര സമര നായകൻ വീർ സവർക്കർക്ക് ഭാരതരത്ന നൽകണമെന്ന് ആർഎസ്എസ് സർസംഘചാലക് ഡോ. മോഹൻ ഭാഗവത്. വീർ സവർക്കർക്ക് നൽകിയാൽ ഭാരതരത്നയുടെ അന്തസ്സ് കൂടുതൽ ഉയരുമെന്നും അദ്ദേഹം പറഞ്ഞു. വിഭജനത്തിന്റെ ഭീതി മറന്ന് അഖണ്ഡ ഭാരതം സാധ്യമാക്കണം. ബംഗ്ലാദേശിൽ ഹിന്ദു സമൂഹം ക്രൂരമായ വിവേചനം നേരിടുന്നതായും സർസംഘചാലക് പറഞ്ഞു.
ആർഎസ്എസ് ശതാബ്ദിയുടെ ഭാഗമായി മുംബൈയിൽ സംഘടിപ്പിച്ച പരിപാടിയിൽ സംസാരിക്കുകയായിരുന്നു അദ്ദേഹം. സംഘയാത്രയുടെ നൂറ് വർഷം – പുതിയ ചക്രവാളങ്ങൾ’ എന്ന വിഷയത്തിൽ വർളി നെഹ്റു സെന്റർ ഓഡിറ്റോറിയത്തിൽ സംഘടിപ്പിച്ച പ്രഭാഷണ പരമ്പരയിൽ സമൂഹത്തിന്റെ വിവിധ മേഖലകളിൽ നിന്നുള്ള വ്യക്തിത്വങ്ങളാണ് പങ്കെടുക്കുന്നത്.
ബോളിവുഡ് താരങ്ങളായ സൽമാൻ ഖാൻ, രൺബീർ കപൂർ. ചലച്ചിത്ര പ്രവർത്തകരായ മോഹിത് സൂരി, സുഭാഷ് ഘായി, നിതേഷ് തിവാരി, ഓം റാവത്ത്, നിർമ്മാതാക്കളായ മഹാവീർ ജെയിന് , വിക്രം മൽഹോത്ര എന്നിവരും ചടങ്ങിൽ പങ്കെടുത്തു. മുതിർന്ന ആർഎസ്എസ് കാര്യകർത്താക്കളും പ്രഭാഷകരും അടക്കം സമൂഹത്തിന്റെ വിവിധ തുറകളിൽപ്പെട്ട വ്യക്തികൾ പരിപാടിയുടെ ഭാഗമാകുന്നുണ്ട്.
