ന്യൂഡൽഹി: പുതിയ മൊബൈല് ആപ്പിന് രൂപം നൽകാനൊരുങ്ങി ഇപിഎഫ്ഒ (എംപ്ലോയീസ് പ്രൊവിഡന്റ് ഫണ്ട് ഓര്ഗനൈസേഷന്). ഏപ്രിലില് ആപ്പ് പ്രവർത്തനക്ഷമമാകുമെന്നാണ് റിപ്പോർട്ട്. പുതിയ ആപ്പ് പ്രവർത്തന സജ്ജമാകുന്നതോടെ പ്രൊവിഡന്റ് ഫണ്ടില് നിന്ന് യുപിഐ വഴിയും പണം പിന്വലിക്കാൻ സാധിക്കും.
നിലവില് പിഎഫ് ക്ലെയിമുകള് തീര്പ്പാക്കാനെടുക്കുന്ന സമയത്തേക്കാൾ കുറവ് സമയം മാത്രമെടുക്കുന്ന സാങ്കേതികവിദ്യ നടപ്പിലാക്കുക എന്ന ലക്ഷ്യത്തോടെയാണ് ഈ മാറ്റം കൊണ്ടുവരുന്നത്. ഇതിലൂടെ ഉപയോക്താക്കൾക്ക് തങ്ങളുടെ ബാങ്ക് അക്കൗണ്ടുകളിലേക്ക് യുപിഐ പിന് ഉപയോഗിച്ച് പണം ഉടന് കൈമാറാന് സാധിക്കും. ഒരിടപാടില് പരമാവധി 25,000 രൂപ വരെ പിന്വലിക്കാന് സാധിക്കും. എന്നാൽ വിരമിക്കല് കാലത്തെ സുരക്ഷക്കായി നീക്കിവെക്കുന്ന പണത്തിൽ മൊത്തം ബാലന്സിന്റെ 25 ശതമാനം തുക മാത്രമേ പിന്വാലിക്കാൻ സാധിക്കൂ. ബാക്കിയുള്ള തുക അംഗങ്ങള്ക്ക് ചികിത്സ, വിദ്യാഭ്യാസം, വിവാഹം, വീട് നിര്മാണം തുടങ്ങി അവരുടെ ആവശ്യാനുസരണം പിൻവലിക്കാം.
പുതിയ ആപ്പ് വന്നാലും നിലവിലുള്ള ഉമംഗ് ആപ്പും പോര്ട്ടലും തുടര്ന്നും പ്രവര്ത്തിക്കും. എട്ട് കോടിയോളം വരുന്ന ഇപിഎഫ്ഒ അംഗങ്ങള്ക്ക് പുതിയ സംവിധാനം വളരെ പ്രയോജനകരമായിരിക്കുമെന്നാണ് പഠനങ്ങൾ പറയുന്നത്. ഇതിന്റെ മുന്നോടിയായി 100 ഡമ്മി അക്കൗണ്ടുകള് ഉപയോഗിച്ചുള്ള പരീക്ഷണങ്ങള് കേന്ദ്രമന്ത്രാലയം നടത്തുന്നുണ്ട്.
