ലഖ്നൗ: സ്ത്രീകള്‍ക്ക് സുരക്ഷിതമായ യാത്രാസൗകര്യമൊരുക്കുന്നതിനൊപ്പം ഗ്രാമീണ തൊഴിലവസരങ്ങള്‍ വര്‍ദ്ധിപ്പിക്കുക എന്ന ലക്ഷ്യത്തോടെ ‘സേഫ് മൊബിലിറ്റി’ പദ്ധതിയുമായി യോഗി ആദിത്യനാഥ് സര്‍ക്കാര്‍. സംസ്ഥാനത്തെ സ്ത്രീകള്‍ക്ക് സാമ്പത്തിക സ്വാശ്രയത്വം ഉറപ്പാക്കുന്നതിനായി വനിതകള്‍ തന്നെ ഓടിക്കുന്ന ഇ-റിക്ഷാ പദ്ധതിക്കാണ് യുപി സര്‍ക്കാര്‍ തുടക്കം കുറിച്ചിരിക്കുന്നത്.
സ്ത്രീകളുടെയും പെണ്‍കുട്ടികളുടെയും യാത്രാസുരക്ഷ ഉറപ്പാക്കുക, അവര്‍ക്ക് സുസ്ഥിരമായ വരുമാന മാര്‍ഗ്ഗം കണ്ടെത്തുക എന്നീ രണ്ട് പ്രധാന ലക്ഷ്യങ്ങളാണ് ഈ പദ്ധതിക്കുള്ളത്. ആദ്യഘട്ടത്തില്‍ സ്വയംസഹായ സംഘങ്ങളിലെ വനിതകള്‍ക്കായി 1,000 ഇ-റിക്ഷകളാണ് വിതരണം ചെയ്യുന്നത്. വാഹനങ്ങള്‍ നല്‍കുന്നതിനൊപ്പം ഡ്രൈവിംഗ് പരിശീലനം, സാമ്പത്തിക സഹായം, ലൈസന്‍സ് എടുക്കുന്നതിനുള്ള മാര്‍ഗ്ഗനിര്‍ദ്ദേശങ്ങള്‍ എന്നിവയും സര്‍ക്കാര്‍ നേരിട്ട് നല്‍കുന്നു.
അയോധ്യ, ഗോരഖ്പൂര്‍, വാരാണസി, കൗശാംബി, ഝാന്‍സി എന്നീ പ്രധാന ജില്ലകളില്‍ പദ്ധതി വിജയകരമായി ആരംഭിച്ചു കഴിഞ്ഞു. രണ്ടാം ഘട്ടത്തില്‍ ലഖ്നൗ, പ്രയാഗ്രാജ്, മിര്‍സാപൂര്‍, ഭദോഹി, സോന്‍ഭദ്ര, ദേവാരിയ, ലഖിംപൂര്‍ ഖേരി, സീതാപൂര്‍ തുടങ്ങിയ ജില്ലകളിലേക്കും ഈ സേവനം വ്യാപിപ്പിക്കുമെന്ന് അധികൃതര്‍ അറിയിച്ചു. സ്‌കൂളുകള്‍, കോളേജുകള്‍, ജോലിസ്ഥലങ്ങള്‍ എന്നിവിടങ്ങളിലേക്ക് പോകുന്ന പെണ്‍കുട്ടികള്‍ക്കും സ്ത്രീകള്‍ക്കും ഭയരഹിതമായി യാത്ര ചെയ്യാന്‍ വനിതാ ഡ്രൈവര്‍മാരുടെ സാന്നിധ്യം സഹായിക്കും.
പദ്ധതിയില്‍ പങ്കാളികളാകുന്ന വനിതകള്‍ക്ക് പ്രതിവര്‍ഷം 3 ലക്ഷം രൂപയിലധികം വരുമാനം ലഭിക്കുന്നുണ്ടെന്നാണ് പ്രാഥമിക കണക്കുകള്‍ സൂചിപ്പിക്കുന്നത്. ഇത് ഗ്രാമീണ കുടുംബങ്ങളുടെ സാമ്പത്തിക നിലവാരത്തില്‍ വലിയ മാറ്റമുണ്ടാക്കുന്നു. ഇതുവരെ 119 സ്ത്രീകള്‍ ഇ-റിക്ഷാ സംരംഭകരായി മാറിക്കഴിഞ്ഞു. 629 പേര്‍ പരിശീലനം പൂര്‍ത്തിയാക്കി. വാഹനത്തിന്റെ അറ്റകുറ്റപ്പണികളും സാമ്പത്തിക ഇടപാടുകളും കൈകാര്യം ചെയ്യാന്‍ ഇവര്‍ക്ക് പ്രത്യേക പരിശീലനം നല്‍കുന്നുണ്ട്.
സാമൂഹിക മാറ്റത്തിനൊപ്പം പരിസ്ഥിതി സംരക്ഷണത്തിനും യോഗി സര്‍ക്കാര്‍ പ്രാധാന്യം നല്‍കുന്നു. ഇലക്ട്രിക് വാഹനങ്ങളായ ഇ-റിക്ഷകള്‍ വഴി മലിനീകരണം കുറയ്‌ക്കാനും ഹരിത ഗതാഗത സംവിധാനങ്ങള്‍ പ്രോത്സാഹിപ്പിക്കാനും പദ്ധതി ലക്ഷ്യമിടുന്നു. ഉത്തര്‍പ്രദേശ് സ്റ്റേറ്റ് റൂറല്‍ ലൈവ്ലിഹുഡ് മിഷന്റെയും ഡെവലപ്മെന്റ് ആള്‍ട്ടര്‍നേറ്റീവ്സിന്റെയും സഹകരണത്തോടെയാണ് ഈ പദ്ധതി നടപ്പിലാക്കുന്നത്. ഗതാഗത മേഖല പോലെ പുരുഷാധിപത്യമുള്ള മേഖലകളില്‍ സ്ത്രീകളുടെ സാന്നിധ്യം ഉറപ്പാക്കുന്നതിലൂടെ വലിയൊരു സാമൂഹിക മാറ്റത്തിനാണ് കേന്ദ്ര-സംസ്ഥാന സര്‍ക്കാരുകള്‍ ഇതിലൂടെ അടിത്തറയിടുന്നത്.
