മനില: ഇന്ത്യയും ആസിയാന്‍ രാജ്യങ്ങളും തമ്മിലുള്ള സമഗ്ര തന്ത്രപ്രധാന പങ്കാളിത്തം ശക്തമാക്കുന്നതിനായി 28-ാമത് സീനിയര്‍ ഒഫീഷ്യല്‍സ് മീറ്റിംഗ് ഫിലിപ്പീന്‍സിലെ മനിലയില്‍ നടന്നു. ഇന്ത്യന്‍ വിദേശകാര്യ മന്ത്രാലയ സെക്രട്ടറി (ഈസ്റ്റ്) പി. കുമാരനും ഫിലിപ്പീന്‍സ് പോളിസി അണ്ടര്‍സെക്രട്ടറി ലിയോ എം. ഹെരേര-ലിമ്മും സംയുക്തമായാണ് യോഗത്തിന് അധ്യക്ഷത വഹിച്ചത്. പ്രധാനമന്ത്രി നരേന്ദ്ര മോദിയുടെ പ്രഖ്യാപനപ്രകാരം 2026-നെ ‘ഇന്ത്യ-ആസിയാന്‍ സമുദ്ര സഹകരണ വര്‍ഷമായി’ ആചരിക്കുന്നതിന്റെ ഭാഗമായുള്ള പ്രവര്‍ത്തനങ്ങള്‍ യോഗം വിലയിരുത്തി.
2025 ഒക്ടോബറില്‍ നടന്ന ഇന്ത്യ-ആസിയാന്‍ ഉച്ചകോടിയിലെ തീരുമാനങ്ങളുടെ പുരോഗതിയും യോഗം ചര്‍ച്ച ചെയ്തു. മേഖലയിലെ കണക്റ്റിവിറ്റിയും സമുദ്രാധിഷ്ഠിത സാമ്പത്തിക പ്രവര്‍ത്തനങ്ങളും മെച്ചപ്പെടുത്തുന്നതിലൂടെ ഇന്ത്യയുടെ ‘ആക്റ്റ് ഈസ്റ്റ്’ നയത്തിന് കൂടുതല്‍ കരുത്തുപകരാന്‍ യോഗം തീരുമാനിച്ചു. കൗലാലംപൂരില്‍ നടന്ന 22-ാമത് ഇന്ത്യ-ആസിയാന്‍ ഉച്ചകോടിയില്‍ അംഗീകരിച്ച സുസ്ഥിര ടൂറിസം സംബന്ധിച്ച സംയുക്ത പ്രസ്താവന നടപ്പിലാക്കുന്നതിനും യോഗം മുന്‍ഗണന നല്‍കി. ഇതിന്റെ ഭാഗമായി ചില നടപടികള്‍ സ്വീകരിക്കും.
മലിനീകരണം കുറയ്‌ക്കുന്നതിനും പരിസ്ഥിതി സംരക്ഷണത്തിനും മുന്‍തൂക്കം നല്‍കുന്ന ഉത്തരവാദിത്ത ടൂറിസം പ്രോത്സാഹിപ്പിക്കും. ‘ലൈഫ്’ പദ്ധതിയുടെ ഭാഗമായി സുസ്ഥിരവും ഗ്രഹാനുകൂലവുമായ രീതികള്‍ ടൂറിസം മേഖലയില്‍ നടപ്പിലാക്കും. പ്ലാസ്റ്റിക് മാലിന്യങ്ങള്‍ ഒഴിവാക്കാനും ‘റീഡ്യൂസ്, റീയൂസ്, റീസൈക്കിള്‍’ മാതൃക പിന്തുടരാനും ധാരണയായി. പ്രകൃതിദത്ത വിഭവങ്ങളുടെ അമിത ഉപയോഗം നിയന്ത്രിക്കാനും ജൈവവൈവിധ്യത്തിന് അനുയോജ്യമായ ടൂറിസം രീതികള്‍ നടപ്പിലാക്കാനും അംഗരാജ്യങ്ങള്‍ തീരുമാനിച്ചു.
ഇരുപത്തിയൊന്നാം നൂറ്റാണ്ട് ഇന്ത്യയുടെയും ആസിയാന്റെയും കാലമാണെന്ന പ്രധാനമന്ത്രി നരേന്ദ്ര മോദിയുടെ കാഴ്ചപ്പാട് മുന്‍നിര്‍ത്തിയാണ് നയതന്ത്ര നീക്കങ്ങള്‍ പുരോഗമിക്കുന്നത്. വിദേശകാര്യ മന്ത്രാലയ വക്താവ് രണ്‍ധീര്‍ ജയ്സ്വാളാണ് എക്സിലൂടെ ചര്‍ച്ചകളുടെ വിശദാംശങ്ങള്‍ പങ്കുവെച്ചത്.
