തിരുവനന്തപുരം: സംസ്ഥാനത്ത് വേനല്‍ച്ചൂട് കടുത്തതോടെ വൈദ്യുതി ഉപയോഗം മുമ്പെങ്ങുമില്ലാത്ത വിധം ഉയരങ്ങളിലേക്ക്. ചരിത്രത്തിലെ ഏറ്റവും ഉയര്‍ന്ന പ്രതിദിന ഉപഭോഗമാണ് ഇന്നലെ രേഖപ്പെടുത്തിയത്. ലഭ്യമായ കണക്കുകള്‍ പ്രകാരം 118.26 ദശലക്ഷം യൂണിറ്റ് വൈദ്യുതിയാണ് ഇന്നലെ മാത്രം കേരളം ഉപയോഗിച്ചത്. ഈ മാസം 18-ന് രേഖപ്പെടുത്തിയ 117.15 ദശലക്ഷം യൂണിറ്റിന്റെ റെക്കോര്‍ഡാണ് ഇതോടെ തിരുത്തപ്പെട്ടത്.
91.78 ദശലക്ഷം യൂണിറ്റ് (ഇതും ഒരു റെക്കോര്‍ഡാണ്) പുറത്ത് നിന്ന് വാങ്ങിയത്. നിലവില്‍ 15 മുതല്‍ 30 മിനിറ്റ് വരെ പവര്‍ കട്ട് ഏര്‍പ്പെടുത്തിയിട്ടുണ്ട്. ഉപഭോഗം വര്‍ദ്ധിക്കുന്നതിനനുസരിച്ച് വൈദ്യുതി കണ്ടെത്താന്‍ കെ.എസ്.ഇ.ബി വലിയ ബുദ്ധിമുട്ടാണ് നേരിടുന്നത്. പുറത്തുനിന്ന് 250 മെഗാവാട്ട് അധികമായി വാങ്ങാന്‍ റെഗുലേറ്ററി കമ്മീഷന്‍ അനുമതി നല്‍കിയെങ്കിലും പവര്‍ എക്‌സ്‌ചേഞ്ചുകളില്‍ ആവശ്യത്തിന് വൈദ്യുതി ലഭ്യമല്ലാത്തത് ബോര്‍ഡിനെ വെട്ടിലാക്കിയിരിക്കുകയാണ്.
വൈകുന്നേരങ്ങളിലെ അമിത ഉപയോഗം നിയന്ത്രിക്കുന്നതിനായി ‘പീക്ക് ലോഡ് മാനേജ്മെന്റ്’ എന്ന പേരില്‍ നിയന്ത്രണങ്ങള്‍ കടുപ്പിക്കാനാണ് അധികൃതരുടെ തീരുമാനം. നിലവിലെ സാഹചര്യത്തില്‍ വരും ദിവസങ്ങളിലും വൈദ്യുതി നിയന്ത്രണം തുടരാനോ അല്ലെങ്കില്‍ സമയം വര്‍ദ്ധിപ്പിക്കാനോ സാധ്യതയുണ്ട്. അമിത ഉപയോഗം കുറച്ച് പ്രതിസന്ധി മറികടക്കാന്‍ ഉപഭോക്താക്കള്‍ സഹകരിക്കണമെന്ന് കെ.എസ്.ഇ.ബി അഭ്യര്‍ത്ഥിച്ചു.
