തിരുവനന്തപുരം: കേരളത്തിന്റെ രാഷ്‌ട്രീയ ചരിത്രത്തില്‍ പുതിയ അധ്യായം കുറിച്ചുകൊണ്ട് നിയമസഭയിലേക്ക് തിരഞ്ഞെടുക്കപ്പെട്ട ബിജെപി പ്രതിനിധികള്‍ക്ക് തലസ്ഥാനത്ത് ഉജ്ജ്വല സ്വീകരണം. വി. മുരളീധരന്‍, രാജീവ് ചന്ദ്രശേഖര്‍, ബി.ബി. ഗോപകുമാര്‍ എന്നിവര്‍ തിരുവനന്തപുരം മാരാര്‍ജി ഭവനില്‍ നടന്ന ചടങ്ങില്‍ പ്രവര്‍ത്തകരുടെ ആവേശോജ്ജ്വലമായ വരവേല്‍പ്പ് ഏറ്റുവാങ്ങി. കേവലം മൂന്ന് പേരാണ് ജയിച്ചതെങ്കിലും മുപ്പത് പേരുടെ വീര്യത്തോടെ നിയമസഭയില്‍ പ്രവര്‍ത്തിക്കുമെന്ന് നിയുക്ത എംഎല്‍എമാര്‍ പ്രഖ്യാപിച്ചു. പ്രധാനമന്ത്രി നരേന്ദ്ര മോദിയുടെ വികസന രാഷ്ട്രീയമായിരിക്കും തങ്ങളുടെ വഴികാട്ടിയെന്ന് ഇവര്‍ ഒരേസ്വരത്തില്‍ പറഞ്ഞു.
‘എണ്ണം കുറവാണെങ്കിലും നൂറുപേരടങ്ങുന്ന ഭരണപക്ഷത്തെ നേരായ വഴിക്ക് നടത്താന്‍ നരേന്ദ്ര മോദിയുടെ ഈ മൂന്ന് പോരാളികള്‍ മതിയാകും. അഴിമതിക്കെതിരെ വിട്ടുവീഴ്ചയില്ലാത്ത നിലപാട് സഭയിലുണ്ടാകും എന്ന് രാജീവ് ചന്ദ്രശേഖര്‍ പറഞ്ഞു. ‘ജനങ്ങളുടെ അടിസ്ഥാന പ്രശ്‌നങ്ങള്‍ സഭയുടെ ശ്രദ്ധയില്‍ കൊണ്ടുവരുന്നതില്‍ ബിജെപി അംഗങ്ങള്‍ വിട്ടു വീഴ്ച ചെയ്യില്ല. കേരളത്തിന്റെ ശബ്ദമായി ഞങ്ങള്‍ മാറും എന്ന് മുരളീധരന്‍ പറഞ്ഞപ്പോള്‍ ‘തന്റെ വിജയത്തിന് പിന്നില്‍ ചാത്തന്നൂരിലെ സാധാരണക്കാരായ ജനങ്ങളാണ്. നിയമസഭയില്‍ പ്രധാനമന്ത്രിയുടെ സന്ദേശം ഉയര്‍ത്തിപ്പിടിക്കും എന്ന് ബി ബി ഗോപകുമാര്‍ പറഞ്ഞു.
വിജയികളെ കിരീടം അണിയിച്ചും ഹാരങ്ങള്‍ ചാര്‍ത്തിയുമാണ് പാര്‍ട്ടി ആസ്ഥാനം സ്വീകരിച്ചത്. ബിജെപി സംസ്ഥാന ജനറല്‍ സെക്രട്ടറിമാരായ എം.ടി. രമേശ്, അഡ്വ. എസ്. സുരേഷ് എന്നിവരുടെ നേതൃത്വത്തില്‍ നടന്ന ചടങ്ങില്‍ മുതിര്‍ന്ന നേതാക്കളായ പി.കെ. കൃഷ്ണദാസ്, മുന്‍ ഡിജിപി ആര്‍. ശ്രീലേഖ, ഡോ. അബ്ദുള്‍ സലാം തുടങ്ങിയവര്‍ പങ്കെടുത്തു.
എന്‍ഡിഎയുടെ വിവിധ ഘടകകക്ഷി നേതാക്കളും യുവമോര്‍ച്ച പ്രവര്‍ത്തകരും സ്വീകരണത്തിന് മാറ്റുകൂട്ടി. കേരളത്തിന്റെ നിയമസഭയ്‌ക്കുള്ളില്‍ ബിജെപിയുടെ സാന്നിധ്യം ഉറപ്പായതോടെ സംസ്ഥാന രാഷ്‌ട്രീയത്തില്‍ പുതിയൊരു ത്രികോണ മത്സരത്തിന് കൂടി വഴിതുറന്നിരിക്കുകയാണ്. വരും ദിവസങ്ങളില്‍ സഭയ്‌ക്കകത്തും പുറത്തും ശക്തമായ രാഷ്‌ട്രീയ നീക്കങ്ങളുമായി മുന്നോട്ട് പോകാനാണ് ബിജെപി തീരുമാനം.
