ന്യൂഡല്‍ഹി: സുപ്രീം കോടതിയിലെ ജഡ്ജിമാരുടെ എണ്ണം വര്‍ധിപ്പിക്കാനുള്ള നിര്‍ണ്ണായക നീക്കവുമായി കേന്ദ്ര സര്‍ക്കാര്‍. നിലവിലുള്ള 34 ജഡ്ജിമാരുടെ എണ്ണം ചീഫ് ജസ്റ്റിസ് ഉള്‍പ്പെടെ 38 ആയി ഉയര്‍ത്താനുള്ള നിര്‍ദ്ദേശത്തിന് കഴിഞ്ഞ ദിവസം ചേര്‍ന്ന കേന്ദ്ര മന്ത്രിസഭാ യോഗം അംഗീകാരം നല്‍കി. പ്രധാനമന്ത്രി നരേന്ദ്ര മോദിയുടെ അധ്യക്ഷതയില്‍ ചേര്‍ന്ന യോഗത്തിലാണ് ‘സുപ്രീം കോടതി (ജഡ്ജിമാരുടെ എണ്ണം) ഭേദഗതി ബില്ല്, 2026’ പാര്‍ലമെന്റില്‍ അവതരിപ്പിക്കാന്‍ തീരുമാനമായതെന്ന് കേന്ദ്ര മന്ത്രി അശ്വിനി വൈഷ്ണവ് അറിയിച്ചു.
ചീഫ് ജസ്റ്റിസ് ഉള്‍പ്പെടെ 34 ജഡ്ജിമാര്‍ (33 ജഡ്ജിമാരും ഒരു ചീഫ് ജസ്റ്റിസും). ജഡ്ജിമാരുടെ എണ്ണം നാലു കൂടി വര്‍ധിപ്പിക്കും. ഇതോടെ ആകെ എണ്ണം 38 ആയി മാറും (37 ജഡ്ജിമാരും ഒരു ചീഫ് ജസ്റ്റിസും). വരാനിരിക്കുന്ന പാര്‍ലമെന്റ് സമ്മേളനത്തില്‍ സര്‍ക്കാര്‍ പുതിയ ബില്ല് അവതരിപ്പിക്കും. പാര്‍ലമെന്റ് പാസാക്കുന്നതോടെ ഇത് നിയമമാകും. നീതിനിര്‍വ്വഹണം കൂടുതല്‍ വേഗത്തിലാക്കാനും സുപ്രീം കോടതിയുടെ പ്രവര്‍ത്തനക്ഷമത വര്‍ധിപ്പിക്കാനുമാണ് ഈ നീക്കമെന്ന് സര്‍ക്കാര്‍ പ്രസ്താവനയില്‍ വ്യക്തമാക്കി. പുതിയ ജഡ്ജിമാരുടെയും അനുബന്ധ ജീവനക്കാരുടെയും ശമ്പളം ഉള്‍പ്പെടെയുള്ള ചെലവുകള്‍ ഇന്ത്യയുടെ ഏകീകൃത നിധിയില്‍ നിന്നാണ് കണ്ടെത്തുക.
1956-ലെ സുപ്രീം കോടതി (ജഡ്ജിമാരുടെ എണ്ണം) നിയമപ്രകാരം ചീഫ് ജസ്റ്റിസിനെ കൂടാതെ വെറും 10 ജഡ്ജിമാര്‍ മാത്രമാണ് തുടക്കത്തില്‍ ഉണ്ടായിരുന്നത്. പിന്നീട് പല കാലങ്ങളിലായി ഇത് വര്‍ധിപ്പിച്ചു. 1960 ജഡ്ജിമാരുടെ എണ്ണം 13 ആയി, 1977 അംഗസംഖ്യ 17 ആയി ഉയര്‍ത്തി, 1986 എണ്ണം 25 ആയി വര്‍ധിപ്പിച്ചു, ജഡ്ജിമാരുടെ എണ്ണം 30 ആയി ഉയര്‍ത്തി, 2019 ല്‍ അവസാനമായി നടന്ന ഭേദഗതിയിലൂടെ എണ്ണം 33 (ചീഫ് ജസ്റ്റിസ് ഒഴികെ) ആയി നിശ്ചയിച്ചു.
വര്‍ധിച്ചുവരുന്ന കേസുകളുടെ എണ്ണം കണക്കിലെടുത്ത് ഏഴ് വര്‍ഷത്തിന് ശേഷമാണ് ഇപ്പോള്‍ വീണ്ടും അംഗസംഖ്യ വര്‍ധിപ്പിക്കാന്‍ സര്‍ക്കാര്‍ തീരുമാനിച്ചിരിക്കുന്നത്.
