തിരുവനന്തപുരം: സംസ്ഥാനത്ത് പകര്‍ച്ചവ്യാധികള്‍ രൂക്ഷമാകുന്നതിനിടെ കഴിഞ്ഞ 20 ദിവസത്തിനിടെ വിവിധ രോഗങ്ങള്‍ ബാധിച്ച് 67 പേര്‍ മരിച്ചതായി ആരോഗ്യവകുപ്പിന്റെ കണക്കുകള്‍. എലിപ്പനി, ഇന്‍ഫ്‌ലുവന്‍സ, ഡെങ്കിപ്പനി, ഷിഗെല്ല എന്നിവ മൂലമാണ് പ്രധാനമായും മരണങ്ങള്‍ റിപ്പോര്‍ട്ട് ചെയ്തിരിക്കുന്നത്. രോഗവ്യാപനം നിയന്ത്രിക്കാന്‍ അടിയന്തര പ്രതിരോധ നടപടികള്‍ ശക്തമാക്കാനുള്ള നീക്കത്തിലാണ് സര്‍ക്കാര്‍.
മരണങ്ങളില്‍ 13 എണ്ണം എലിപ്പനി മൂലവും 13 എണ്ണം ഇന്‍ഫ്‌ലുവന്‍സ മൂലവുമാണ്. ഡെങ്കിപ്പനി ബാധിച്ച് 11 പേരും ജീവന്‍ നഷ്ടപ്പെടുത്തി. സംസ്ഥാനത്താകെ 5,500-ലധികം പേര്‍ക്ക് ഡെങ്കിപ്പനി ബാധിച്ചതായും റിപ്പോര്‍ട്ടുകളുണ്ട്. ഷിഗെല്ല രോഗബാധ സ്ഥിരീകരിച്ച 133 പേരില്‍ അഞ്ച് കുട്ടികള്‍ മരണമടഞ്ഞതും ആരോഗ്യരംഗത്തെ ആശങ്ക വര്‍ധിപ്പിക്കുന്നു.
പനി ലക്ഷണങ്ങളുമായി ചികിത്സ തേടിയവരുടെ എണ്ണം രണ്ട് ലക്ഷത്തി പതിനൊമ്പതിനായിരം കടന്നിരിക്കുകയാണ്. രോഗവ്യാപനം നിയന്ത്രിക്കാന്‍ രൂപീകരിച്ച ഹൈപവര്‍ കമ്മിറ്റി ഉടന്‍ തന്നെ സര്‍ക്കാരിന് വിശദമായ ശുപാര്‍ശകള്‍ സമര്‍പ്പിക്കുമെന്നാണ് വിവരം.
ഡെങ്കിപ്പനി വ്യാപനം തടയുന്നതിന്റെ ഭാഗമായി സംസ്ഥാനത്ത് ഇന്ന് പ്രത്യേക ഡ്രൈ ഡേ ആചരിക്കുകയാണ്. വീടുകളിലും സ്ഥാപനങ്ങളിലും പരിസരങ്ങളിലും വെള്ളം കെട്ടിക്കിടക്കുന്ന സാഹചര്യം ഒഴിവാക്കി ശുചീകരണ പ്രവര്‍ത്തനങ്ങള്‍ നടത്തണമെന്ന് ആരോഗ്യവകുപ്പ് നിര്‍ദേശിച്ചിട്ടുണ്ട്. കൊതുകുകളുടെ പ്രജനന കേന്ദ്രങ്ങള്‍ ഇല്ലാതാക്കുകയാണ് പ്രധാന ലക്ഷ്യം.
കവടിയാര്‍ ജവഹര്‍ നഗറിലെ സ്വന്തം വസതിയില്‍ ആരോഗ്യ മന്ത്രി കെ. മുരളീധരന്‍ ശുചീകരണ പ്രവര്‍ത്തനങ്ങള്‍ക്ക് തുടക്കം കുറിക്കും. ഡെങ്കിപ്പനി പരത്തുന്ന ഈഡിസ് കൊതുകുകളുടെ ഉറവിടങ്ങള്‍ നശിപ്പിക്കാന്‍ പൊതുജനങ്ങളുടെ സജീവ സഹകരണം അനിവാര്യമാണെന്നും ആരോഗ്യവകുപ്പ് വ്യക്തമാക്കി.
ഈ മാസം മാത്രം പനി ബാധിച്ച് ചികിത്സ തേടിയത് 2,06,801 പേരാണ്. ഇതില്‍ 1,195 പേര്‍ക്ക് ഡെങ്കിപ്പനി സ്ഥിരീകരിച്ചപ്പോള്‍ 4,118 പേര്‍ക്ക് രോഗലക്ഷണങ്ങളുടെ അടിസ്ഥാനത്തില്‍ ഡെങ്കിപ്പനി സംശയിക്കുന്നുണ്ട്. 186 പേര്‍ക്ക് എലിപ്പനിയും സ്ഥിരീകരിച്ചിട്ടുണ്ട്.
അതേസമയം എംപോക്‌സ്, അമീബിക് മസ്തിഷ്‌ക ജ്വരം, ഷിഗെല്ല തുടങ്ങിയ രോഗങ്ങളും റിപ്പോര്‍ട്ട് ചെയ്യുന്നവരുടെ എണ്ണം ഉയരുന്ന സാഹചര്യത്തില്‍ സംസ്ഥാനം അതീവ ജാഗ്രത പാലിക്കണമെന്ന് ആരോഗ്യ മന്ത്രി മുന്നറിയിപ്പ് നല്‍കി. രോഗലക്ഷണങ്ങള്‍ കണ്ടാല്‍ ചികിത്സ വൈകിക്കരുതെന്നും പരിസര ശുചിത്വം ഉറപ്പാക്കിയാണ് രോഗവ്യാപനം തടയാനാകുകയെന്നും അധികൃതര്‍ ആവര്‍ത്തിച്ചു.
