മുംബൈ: ബോക്സ് ഓഫീസിൽ തരംഗം സൃഷ്ടിച്ച് പ്രിയദർശൻ-അക്ഷയ് കുമാർ ചിത്രം ‘ഭൂത് ബംഗ്ല’ മുന്നേറുന്നു. 14 വർഷത്തെ ഇടവേളയ്ക്ക് ശേഷം ഈ ഹിറ്റ് കൂട്ടുകെട്ട് ഒന്നിച്ചപ്പോൾ പിറന്നത് നിർമ്മാതാവ് ഏക്ത കപൂറിന്റെ കരിയറിലെ ഏറ്റവും വലിയ വിജയമാണ്. ചിത്രം 200 കോടി ക്ലബ്ബിൽ ഇടംപിടിച്ച വേളയിൽ, സംവിധായകൻ പ്രിയദർശനെ പ്രശംസിച്ചും നന്ദി അറിയിച്ചും ഏക്ത കപൂർ പങ്കുവെച്ച കുറിപ്പാണ് ഇപ്പോൾ സോഷ്യൽ മീഡിയയിൽ ശ്രദ്ധേയമാകുന്നത്.
സിനിമയുടെ തുടക്കത്തിൽ പ്രിയദർശൻ ചോദിച്ച ഒരു ചോദ്യം തന്നെ ഏറെ അത്ഭുതപ്പെടുത്തിയെന്ന് ഏക്ത വെളിപ്പെടുത്തി. “ഈ സിനിമയിലൂടെ നിങ്ങൾ പണം സമ്പാദിക്കുന്നുണ്ടോ? എന്റെ നിർമ്മാതാവിന് ലാഭമുണ്ടാക്കാൻ കഴിയുന്നില്ലെങ്കിൽ ഞാൻ ആ സിനിമ ചെയ്യില്ല,” എന്നായിരുന്നു പ്രിയദർശന്റെ വാക്കുകൾ. ഒരു സംവിധായകൻ തന്റെ നിർമ്മാതാവിന്റെ സാമ്പത്തിക സുരക്ഷയ്ക്ക് ഇത്രയധികം പ്രാധാന്യം നൽകുന്നത് ഇന്നത്തെ കാലത്ത് അപൂർവമാണെന്ന് ഏക്ത കപൂർ കുറിച്ചു.
നൂറാമത്തെ സിനിമ ചെയ്യുന്ന ഒരു ഇതിഹാസ സംവിധായകനൊപ്പം പ്രവർത്തിക്കുമ്പോൾ ഉണ്ടായ അനുഭവങ്ങളും ഏക്ത പങ്കുവെച്ചു. തങ്ങളെപ്പോലെ ശക്തമായ നിലപാടുകളുള്ള രണ്ട് വ്യക്തികൾ ഒന്നിക്കുമ്പോൾ വലിയ തർക്കങ്ങളുണ്ടാകുമെന്ന് പലരും കരുതിയിരുന്നതായി ഏക്ത പറയുന്നു. എന്നാൽ, പരസ്പര ബഹുമാനത്തിലൂന്നിയ ആ ബന്ധം സിനിമയെ മികച്ച വിജയത്തിലേക്ക് നയിച്ചു.
വാമിഖ ഗബ്ബി, തബു, പരേഷ് റാവൽ, അസ്രാണി, രാജ്പാൽ യാദവ് തുടങ്ങിയ വമ്പൻ താരനിര അണിനിരന്ന ചിത്രം തിയേറ്ററുകളിൽ വലിയ ആഘോഷമായി മാറിയിരിക്കുകയാണ്. ചിത്രം വിജയകരമായി പ്രദർശനം തുടരുമ്പോൾ മലയാളിയായ ആതിര ദിൽജിത്താണ് പിആർഒ പ്രവർത്തനങ്ങൾ ഏകോപിപ്പിക്കുന്നത്.
