റാഞ്ചി: ഇന്ത്യന് ട്രാക്ക് ആന്ഡ് ഫീല്ഡ് ചരിത്രത്തിലെ ഏറ്റവും ആവേശകരമായ പോരാട്ടത്തിനൊടുവില് പുരുഷന്മാരുടെ 100 മീറ്ററില് പുതിയ ദേശീയ റെക്കോര്ഡ് പിറന്നു. റാഞ്ചിയിലെ ബിര്സ മുണ്ട അത്ലറ്റിക്സ് സ്റ്റേഡിയത്തില് നടന്ന ഫെഡറേഷന് കപ്പ് ഫൈനലില് 10.09 സെക്കന്ഡില് ഫിനിഷ് ചെയ്താണ് പഞ്ചാബില് നിന്നുള്ള 25-കാരനായ ഗുരീന്ദര്വീര് സിംഗ് ചരിത്രനേട്ടം സ്വന്തമാക്കിയത്. 100 മീറ്റര് റേസ് 10.10 സെക്കന്ഡില് താഴെ സമയത്തിനുള്ളില് പൂര്ത്തിയാക്കുന്ന ആദ്യ ഇന്ത്യന് താരം എന്ന റെക്കോര്ഡും ഇതോടെ ഗുരീന്ദര്വീറിന് സ്വന്തമായി.
ഈ സീസണിലെ പ്രകടനത്തോടെ ഏഷ്യയിലെ ഏറ്റവും വേഗമേറിയ രണ്ടാമത്തെ താരമെന്ന ബഹുമതിയും ഗുരീന്ദര്വീര് സ്വന്തമാക്കി. ജപ്പാന്റെ ഫുകുട്ടോ കൊമൂറെ (10.08 സെക്കന്ഡ്) മാത്രമാണ് ഇപ്പോള് ഗുരീന്ദറിന് മുന്നിലുള്ളത്. ഈ തകര്പ്പന് പ്രകടനത്തോടെ ഗുരീന്ദര്വീറും ഒഡീഷയുടെ അനിമേഷ് കുജൂറും വരാനിരിക്കുന്ന ഏഷ്യന് ഗെയിംസിനുള്ള യോഗ്യതയും ഉറപ്പാക്കിക്കഴിഞ്ഞു. കഴിഞ്ഞ രണ്ട് ദിവസങ്ങളായി റാഞ്ചിയില് നടന്നത് ഇന്ത്യന് അത്ലറ്റിക്സ് ഇന്നേവരെ സാക്ഷ്യം വഹിക്കാത്ത തരത്തിലുള്ള അത്യന്തം വാശിയേറിയ പോരാട്ടത്തിനായിരുന്നു. സെക്കന്ഡുകളുടെ വ്യത്യാസത്തിലാണ് റെക്കോര്ഡുകള് മാറിമറിഞ്ഞത്:
ഗുരീന്ദര്വീര് സിംഗ് 10.17 സെക്കന്ഡില് ഫിനിഷ് ചെയ്ത് അനിമേഷിന്റെ പഴയ റെക്കോര്ഡ് (10.18 സെക്കന്ഡ്) ആദ്യം തകര്ത്തു. അനിമേഷ് കുജൂര് 10.15 സെക്കന്ഡില് ഓടിയെത്തി ഗുരീന്ദറില് നിന്ന് റെക്കോര്ഡ് തിരിച്ചുപിടിച്ചു. ഫൈനല് മത്സരത്തില് അനിമേഷിന്റെ ആ റെക്കോര്ഡും തകര്ത്തെറിഞ്ഞ് 10.09 സെക്കന്ഡില് ഫിനിഷ് ചെയ്ത് ഗുരീന്ദര്വീര് സിംഗ് സ്വപ്നതുല്യമായ വിജയം സ്വന്തമാക്കി.
കഴിഞ്ഞ വര്ഷം ഒഡീഷയുടെ അനിമേഷ് കുജൂര് സ്ഥാപിച്ച 10.18 സെക്കന്ഡ് എന്ന വേഗതയാണ് ഒരൊറ്റ ടൂര്ണമെന്റിലെ കടുത്ത പോരാട്ടത്തിലൂടെ ഗുരീന്ദര്വീര് സിംഗ് മറികടന്നത്.
