ന്യൂഡല്ഹി: വരാനിരിക്കുന്ന രാജ്യസഭാ ദ്വിവത്സര തിരഞ്ഞെടുപ്പിനും ഒഡീഷ ഉപതിരഞ്ഞെടുപ്പിനുമുള്ള സ്ഥാനാര്ത്ഥികളെ ഭാരതീയ ജനതാ പാര്ട്ടി (ബിജെപി) പ്രഖ്യാപിച്ചു. പാര്ലമെന്റിന്റെ ഉപരിസഭയില് എന്ഡിഎയുടെ ഭൂരിപക്ഷം ശക്തമാക്കുക എന്ന ലക്ഷ്യത്തോടെയാണ് ബിജെപി സ്ഥാനാര്ത്ഥി പട്ടിക പുറത്തുവിട്ടിരിക്കുന്നത്. ബിജെപി ദേശീയ ജനറല് സെക്രട്ടറി അരുണ് സിങ്ങാണ് പട്ടിക പുറത്ത് വിട്ടത്.
രാജസ്ഥാനില് നിന്ന് ഡോ. സതീഷ് പൂനിയ, ഡോ. അല്ക്ക ഗുര്ജര്, മധ്യപ്രദേശ് തരുണ് ചുഗ്, രജനീഷ് അഗര്വാള്, ഗുജറാത്ത് രാജുഭായ് ശുക്ല, മുകേഷ്ഭായ് രത്വ, മാന്സിങ് പാര്മര്, ജിതേന്ദ്ര മേഘ്ജിഭായ് കന്സാരിയ, അരുണാചല് പ്രദേശ് തായ് തഗക്, മണിപ്പൂര് എ. ശാരദ ദേവി, ഒഡീഷ (ഉപതിരഞ്ഞെടുപ്പ്) ദേബാശിഷ് സാമന്തറേ എന്നിവരാണ് സ്ഥാനാര്ത്ഥികള്.
പ്രധാനമന്ത്രി നരേന്ദ്ര മോദിയുടെ അധ്യക്ഷതയില് ചേര്ന്ന ബിജെപി കേന്ദ്ര തിരഞ്ഞെടുപ്പ് കമ്മിറ്റിയുടെ ഉന്നതതല യോഗത്തിന് ശേഷമാണ് സ്ഥാനാര്ത്ഥികളെ തിരഞ്ഞെടുത്തത്. രാജ്യസഭയില് എന്ഡിഎയുടെ അംഗബലം പരമാവധി വര്ദ്ധിപ്പിക്കുകയാണ് ഈ നീക്കത്തിലൂടെ ബിജെപി ലക്ഷ്യമിടുന്നത്. സ്ഥാനാര്ത്ഥികളെ പ്രഖ്യാപിച്ച സംസ്ഥാനങ്ങളില് ബിജെപിക്ക് വ്യക്തമായ ഭൂരിപക്ഷമുള്ളതിനാല് ഇവരുടെ വിജയം സുരക്ഷിതമാണെന്നാണ് വിലയിരുത്തല്.
ജൂണ് 18-നാണ് രാജ്യസഭാ തിരഞ്ഞെടുപ്പ് നിശ്ചയിച്ചിരിക്കുന്നത്. 10 സംസ്ഥാനങ്ങളിലായി 24 സീറ്റുകളിലേക്കാണ് ദ്വിവത്സര തിരഞ്ഞെടുപ്പ് നടക്കുന്നത്. ഇതോടൊപ്പം മഹാരാഷ്ട്ര, തമിഴ്നാട് സംസ്ഥാനങ്ങളിലെ രണ്ട് നിര്ണ്ണായക സീറ്റുകളിലേക്കുള്ള ഉപതിരഞ്ഞെടുപ്പും ഇതേ ദിവസം തന്നെ നടക്കും.
