കൊല്ലം: ഏഴാംമൈലിലെ ഒരു സ്വകാര്യ സ്‌കൂളില്‍ വിദ്യാര്‍ത്ഥികള്‍ക്ക് ഭക്ഷ്യവിഷബാധയേറ്റു. അസുഖബാധിതരായ മുപ്പതിലധികം കുട്ടികളെ വിവിധ ആശുപത്രികളില്‍ പ്രവേശിപ്പിച്ചു. ഇന്നലെ രാത്രിയോടെയാണ് കുട്ടികള്‍ക്ക് ശാരീരിക അസ്വസ്ഥതകള്‍ അനുഭവപ്പെട്ടു തുടങ്ങിയത്. നിലവില്‍ ആശുപത്രിയില്‍ കഴിയുന്ന ആരുടെയും ആരോഗ്യനില ആശങ്കാജനകമല്ലെന്ന് അധികൃതര്‍ വ്യക്തമാക്കി.
സ്‌കൂളിലെ ജലവിതരണ പമ്പ് കേടായതിനെ തുടര്‍ന്ന് താല്‍ക്കാലികമായി പുറത്തുനിന്ന് കുടിവെള്ളം എത്തിക്കാന്‍ ഒരു കരാറുകാരനെ ചുമതലപ്പെടുത്തിയിരുന്നു. ഈ വെള്ളം കുടിച്ച കുട്ടികള്‍ക്കാണ് ഭക്ഷ്യവിഷബാധയേറ്റത്. ശുദ്ധമായ വെള്ളത്തിന് പകരം ഒരു പാറമടയില്‍ നിന്നുള്ള മലിനമായ വെള്ളമാണ് കരാറുകാരന്‍ സ്‌കൂളില്‍ വിതരണം ചെയ്തതെന്നാണ് നാട്ടുകാരും രക്ഷിതാക്കളും ആരോപിക്കുന്നത്.
സംഭവത്തില്‍ പരക്കെ പ്രതിഷേധം ഉയര്‍ന്ന പശ്ചാത്തലത്തില്‍ ആരോഗ്യവകുപ്പ് ഉദ്യോഗസ്ഥര്‍ സ്ഥലത്തെത്തി പരിശോധന നടത്തി. സ്‌കൂളില്‍ വിതരണം ചെയ്ത വെള്ളത്തിന്റെ സാമ്പിളുകള്‍ ശേഖരിച്ച് വിദഗ്‌ദ്ധ പരിശോധനയ്‌ക്കായി ലാബിലേക്ക് അയച്ചിട്ടുണ്ട്. പരിശോധനാ ഫലം വന്ന ശേഷമായിരിക്കും തുടര്‍നടപടികള്‍ സ്വീകരിക്കുക.
