ന്യൂഡല്‍ഹി: ഡല്‍ഹി ഇന്ദിരാഗാന്ധി അന്താരാഷ്‌ട്ര വിമാനത്താവളത്തില്‍ പെട്ടെന്നുണ്ടായ കനത്ത കാറ്റിലും മഴയിലും പെട്ട് നിര്‍ത്തിയിട്ടിരുന്ന മൂന്ന് എയര്‍ ഇന്ത്യ വിമാനങ്ങള്‍ക്ക് കേടുപാടുകള്‍ സംഭവിച്ചു. റണ്‍വേയില്‍ ശക്തമായ കാറ്റടിച്ചതിനെ തുടര്‍ന്ന് വിമാനങ്ങള്‍ക്ക് സമീപം വെച്ചിരുന്ന ഗ്രൗണ്ട് സപ്പോര്‍ട്ട് ഉപകരണങ്ങള്‍ (ഗ്രൗണ്ട് ഹാന്‍ഡ്ലിംഗ് ഉപകരണങ്ങള്‍) നീങ്ങി വന്ന് വിമാനങ്ങളില്‍ ഇടിക്കുകയായിരുന്നു. സംഭവത്തില്‍ അധികൃതര്‍ അന്വേഷണം പ്രഖ്യാപിച്ചിട്ടുണ്ട്.
വിമാനത്താവളത്തിലെ ടെര്‍മിനല്‍ 2-ലാണ് സംഭവം നടന്നത്. കനത്ത മഴയ്‌ക്കൊപ്പം വീശിയടിച്ച ശക്തമായ കാറ്റില്‍ എയര്‍ ഇന്ത്യ എഞ്ചിനീയറിംഗ് സര്‍വീസസിന്റെയും ഇന്‍ഡിഗോയുടെയും ഉടമസ്ഥതയിലുള്ള ഗ്രൗണ്ട് ഹാന്‍ഡ്ലിംഗ് ഉപകരണങ്ങളാണ് സ്ഥാനത്തുനിന്ന് നീങ്ങി എയര്‍ ഇന്ത്യയുടെ മൂന്ന് നാരോ-ബോഡി (ചെറിയ) വിമാനങ്ങളില്‍ പോയി ഇടിച്ചതെന്ന് ഡല്‍ഹി ഇന്റര്‍നാഷണല്‍ എയര്‍പോര്‍ട്ട് ലിമിറ്റഡ് വ്യക്തമാക്കി.
അപകടത്തെ തുടര്‍ന്ന് വിശദമായ പരിശോധനകള്‍ക്കും അറ്റകുറ്റപ്പണികള്‍ക്കുമായി ഈ മൂന്ന് വിമാനങ്ങളും താല്‍ക്കാലികമായി സര്‍വീസില്‍ നിന്നും പിന്‍വലിച്ചിരിക്കുകയാണ്. ഇതില്‍ രണ്ട് വിമാനങ്ങള്‍ ഉടന്‍ തന്നെ സര്‍വീസിലേക്ക് തിരിച്ചെത്തുമെന്നും എന്നാല്‍ മൂന്നാമത്തെ വിമാനത്തിന്റെ അറ്റകുറ്റപ്പണികള്‍ പൂര്‍ത്തിയാക്കാന്‍ കൂടുതല്‍ സമയമെടുക്കുമെന്നും അധികൃതര്‍ അറിയിച്ചു. കനത്ത മണ്‍സൂണ്‍ കാലാവസ്ഥയില്‍ മറ്റ് ചില വിമാനക്കമ്പനികളുടെ വിമാനങ്ങള്‍ക്കും നേരിയ രീതിയില്‍ കേടുപാടുകള്‍ സംഭവിച്ചതായി റിപ്പോര്‍ട്ടുകളുണ്ട്.
കാലാവസ്ഥ പെട്ടെന്നാണ് മാറിമറിഞ്ഞതെന്നും ഈ പെട്ടെന്നുള്ള വ്യതിയാനത്തെക്കുറിച്ച് എയര്‍ ട്രാഫിക് കണ്‍ട്രോളില്‍ നിന്നും വിമാനത്താവള അധികൃതര്‍ക്കോ വിമാനക്കമ്പനികള്‍ക്കോ മുന്‍കൂട്ടി യാതൊരു മുന്നറിയിപ്പും ലഭിച്ചിരുന്നില്ലെന്നും എയര്‍പോര്‍ട്ട് ഉദ്യോഗസ്ഥര്‍ പറഞ്ഞു. അതേസമയം, സംഭവത്തെക്കുറിച്ച് പ്രതികരിക്കാന്‍ എയര്‍ ഇന്ത്യ അധികൃതര്‍ ഇതുവരെ തയ്യാറായിട്ടില്ല. കഴിഞ്ഞ ദിവസങ്ങളില്‍ ഡല്‍ഹിയിലും സമീപപ്രദേശങ്ങളിലും (ഡല്‍ഹി-എന്‍.സി.ആര്‍) ശക്തമായ ഇടിമിന്നലോട് കൂടിയ കനത്ത മഴയാണ് രേഖപ്പെടുത്തിയത്.
വരും ദിവസങ്ങളിലും ഡല്‍ഹിയില്‍ കാലാവസ്ഥ മോശമായി തുടരുമെന്നാണ് പ്രവചനം. ജൂണ്‍ 11, 12 തീയതികളില്‍ മണിക്കൂറില്‍ 60 കിലോമീറ്റര്‍ വരെ വേഗതയില്‍ വീശിയടിക്കാവുന്ന ശക്തമായ കാറ്റിനും ഇടിമിന്നലോടു കൂടിയ നേരിയ മഴയ്‌ക്കും സാധ്യതയുണ്ടെന്ന് ഇന്ത്യന്‍ കാലാവസ്ഥാ വകുപ്പ് (മുന്നറിയിപ്പ് നല്‍കിയിട്ടുണ്ട്.
